खोज

बुटवल, ६ चैत ।

बुटवलकी ममता घिमिरे आईएस एमटी बुटवलमा आईटीकी छात्रा हुन् । प्राविधिक विषयमा चाख भएकी उनको पढाईबाहेक अन्य विषयमा खासै ध्यान थिएन । बुटवलमा भएको मिस वेष्ट्रन नेपालमा अन्तिम ९ मा उनी पर्न सफल भईन् । छनौट भएसंगै फिनालेका लागि दुई हप्तासम्म क्षमता अभिवृद्धिका तालिममा उनी सहभागी भईन् । तालिमपछि भने उनी दङ्ग छिन् ।

पढाई बाहेक समाज र समुदाय नबुझेकी उनी तालिमले धेरै फाईदा मिलेको बताईन् । ‘ब्यक्तिहरुसंग कसरी बोल्ने, सामाजिक विषयबस्तुमा साथीहरुसंग कसरी समन्वय गर्ने, बक्तृत्वकला जस्ता धेरै कुरा सिके’– उनले भनिन् । सौन्दर्य प्रतियोगितालाई समाजले हेर्ने दृष्टिकोण परिवर्तन गर्नुपर्ने उनको धारणा छ । शारीरिक रुपमा मात्र नभई बौद्धिक रुपमा समेत फिट हुनुपर्ने ज्ञान लिएको उनले बताईन् ।

सैनामैनाकी कृष्णा महोत्रा मिस वेष्ट्रन नेपालमा अन्तिम ९ मा पर्न सफल सहभागी हुन् । रानीबगियामा कक्षा १२ विज्ञान संकायमा अध्ययरत उनी साथीहरुसंग खुलेर बोल्न हिचकिचाउँथिन् । दुई हप्ताको तालिमबाट उनी अहिले पढाईसंगै योग, ध्यान, बजारीकरण र युवा उद्यमशिलताका विषयमा सिकाई भएको बताईन् । ‘क्लोज क्याम्पमा युवा वर्ग लक्षित जीवन उपयोगी धेरै नयाँ सिकाई भयो’–उनले भनिन् । अरुको नजरबाट समाजलाई हेर्ने दृष्टिकोण सिकाई भएको उनले बताईन् ।

उनीहरु जस्तै अन्तिम ९ सहभागीहरुलाई दुई हप्तासम्म योगा प्रशिक्षक निश्चल ईन्द्रायणी, राजिव खनाल, गोपाल अधिकारी, छवि शर्मा, समुन्द्र घिमिरे जिसिले तालिमलाई सहजीकरण गरेका छन् । यसबाट उनीहरुमा मनोबल बढेको छ । क्लोज क्याम्पमा योगा, नेतृत्व तालिम, बजारीकरण, फोटो र भिडियो सुट, युवा उद्यमी सम्बन्धी तालिम दिईएको नेक्स्ट रिभोलुसन नेपालका एमडी राजिव खनालले बताए । ‘महिला सशक्तिकरणको यो एउटा अभियान हो’– उनले भने ।

महिलाको सुन्दरतालाई मात्र हेर्ने नभई बौद्धिकता समेत मापन गर्ने रुपमा यो प्रतियोगिता भएको उनले बताए । मिस वेष्ट्रन नेपालको फिनालेको तयारी अन्तिम चरणमा पुगेको छ । चैत ११ हुने होटल फ्लामिङ्गोमा हुने फिनालेको आवश्यक तयारी पूरा भएको उनले बताए । फागुन १७ गते अडिसन सम्पन्न भएको थियो । प्रतियोगिताको अन्तिम ९ मा तिलोत्तमा नगरपालिकाकी बिनिता भट्टराई, बुटवलकी ममता घिमिरे, बुटवलकी निशा पाण्डे, सविता बेलबासे, तिलोत्तमाकी करुणा काफ्ले, सैनामैनाकी अफसना सुनार, सैनामैनाकी कृष्णा माहोत्रा, सिद्धार्थनगरकी मनिषा चौधरी, सैनामैनाकी अजिता रेग्मी अन्तिम प्रतियोगी छन् ।
अन्तर्राष्ट्रिय मान्यताअनुसार न्यूनतम ५ फिट ३ इन्च उचाई तथा १८ देखि २७ वर्षका अविवाहितले भाग लिएका छन् । मिस नेपाल हिडन ट्रेजरको फ्रेन्चाईजीका रुपमा यस क्षेत्रमा संस्थागत रुपमा प्रतियोगिता गर्दै आएको उनले बताए । फिनालेमा विजेता एक जनाले पश्चिम क्षेत्रबाट प्रतिनिधित्व गर्दै मिस नेपालमा भाग लिने उनले बताए । ‘मिस नेपालको प्लेटफर्ममा पुग्ने यो आधार हो ।’–उनले भने । सन २०१८ बाट यो क्षेत्रमा संस्थाले प्रतियोगिता गर्दै आएको छ । यस क्षेत्रबाट प्रतिनिधित्व गरेका सहभागीले मिस नेपालमा टप १२ सम्म पुगेका छन । कार्यक्रम निर्देशक गोपाल अधिकारीले समयसापेक्ष सौन्दर्य प्रतियोगिताको मापदण्डमा परिवर्तन आएको भन्दै बौद्धिक स्तरबाट विजेता बनेर सामाजिक क्षेत्रमा काम गर्ने अवसर समेत यसबाट मिल्ने बताए ।