खोज

बुटवल ।

बुटवल–भैरहवा सडक खण्ड अन्तर्गत तिलोत्तमा नगरपालिका क्षेत्रमा पुग्दा जति आनन्दित र रमणीय लाग्छ, त्यसको ठिक विपरित पट्यारलाग्दो र लज्जास्पद हुन्छ बुटवल उपमहानगर क्षेत्रमा पुग्दा । उही ६ लेनको सडक, उस्तै बजार क्षेत्र तर यी दुई स्थानीय तहको सडक क्षेत्रको तुलना आकाश र धर्तीजस्तै छ ।

बुटवल उपमहानगरपालिका क्षेत्रमा पर्ने राजमार्ग चौराहदेखि चिडियाखोलासम्म पुग्नेले ‘छ्या बुटवल’ भन्छन् भने चौराहदेखि तिलोत्तमा हुँदै भैरहवा पुग्ने यात्रुले ‘वाह बुटवल’ भन्छन् । तिलोत्तमा र बुटवल उपमहानगर क्षेत्र रुपन्देही जिल्लाका फरक फरक स्थानीय तह भएपनि बाहिरी जिल्लाका नागरिकले शहरको नामबाट परिचित ‘बुटवल’ भनेरै बुझ्ने गर्छन् ।

अस्तव्यस्त र धुलाम्मे देखिएको बुटवलको सडक

बुटवल–भैरहवा ओहोरदोहोर गर्ने यात्रुहरुको मोवाइलमा तिलोत्तमा सडक क्षेत्रको झिलिमिली बत्ती, स्पर्श गर्दा पनि फोहोर लाग्ने जस्ता चिल्ला सडक, दायाँबायाँ सजिएर बसेका बेगनबेली फूलहरु र फूटपाथमा पैदल हिडेका यात्रुहरुको तस्विर र भिडियो कैद हुन्छन् । सवार गरिरहेका यात्रुहरु प्रशंसा गर्दै गन्तव्यमा पुग्छन् । उनै यात्रुहरुले मोवाइलमा कैद गर्दै आइरहेको तस्विर र भिडियो भने राजमार्ग चौराहदेखि चिडियाखोलाको दुरीमा पुग्दा रोकिन्छ ।

वर्षौदेखि बुटवल उपमहानगर क्षेत्रमा निर्माणाधीन अवस्थामा रहेको ६ लेन सडककै कारण सिंगो बुटवललाई ‘ लज्जास्पद’ बनाइरहेको हो । सडक निर्माण उपमहानगरको क्षेत्राधिकार भित्र पर्दैैन तर उपमहानगरले कार्यान्वयन गर्ने निकायलाई दवाव र चासो दिन सक्छ । तर, निर्वाचित जनप्रतिनिधिहरु अहिले ‘काँनमा तेल’ हालेर बसेका छन् । नागरिकहरुको पीडामा उनीहरु संवेदनशिल नभएको नागरिकहरु गुनासो गर्छन् । सस्तो लोकप्रियताका लागि चुनाव जितेको जोसमा सुरुवाती महिनामा मेयर, उपमेयर रातीमा पनि सडकमा आएर तमासा देखाएपनि उनीहरु अहिले मौन रहेको नगरक्षेत्रमा रहेका उद्योगी, व्यवसायीको गुनासो छ । समयमै सडक नबनेकै कारण सयौँ व्यवसायीहरु धरासायी हुने खतरामा छन् ।

सुन्दर र रमणिय देखिएको तिलोत्तमा क्षेत्रको सडक

उपमहानगरमा अहिले खेलराज पाण्डेय मेयर छन् । उनै पाण्डेय हुन्, जो यसअघिका मेयर शिवराज सुवेदीको कार्यकालमा उपमहानगरले केही गरेन भनेर चर्को स्वरमा विरोध गर्दै हिड्ने गर्थे । आफू नेतृत्वमा हुँदा पनि उनले केही गर्न नसकेको नगरबासीहरुको दुःखेसो छ । पाण्डेयकै नगरक्षेत्रमा भइरहेको ढिलासुस्ती सडक निर्माणकै कारण सिंगो बुटवल लज्जित मात्र भइरहेको छैन, नागरिकहरु विभिन्न रोगको शिकार समेत बन्ने गरेका छन् ।

बुटवल उपमहानगरपालिकाका प्रमुख प्रशासकीय अधिकृत टेकराज पन्थीका अनुसार उपमहानगरले दैनिक औसतमा पाँच जना क्यान्सर रोगीका विरामीहरुको औषधीउपचारका लागि विभिन्न निकायमा सिफारिस दिने गरेको तथ्यांक छ । जसको मुख्य कारण यही निर्माणाधीन सडक क्षेत्रबाट निस्किने धुलो, धुँवा र हिलो भएको पन्थीको प्रतिक्रिया छ ।

तिलोत्तमा नगरपालिकाले सडक सौन्दर्यताका लागि अथाह बजेट पनि खर्च गरेको होइन, चार÷पाँच लाख रुपैयाँ बजेटको परिधिभित्रै यो सवै काम संभव भएको नगरपालिकाका प्रमुख प्रशासकीय अधिकृत नारायण अर्यालले जानकारी दिए । हरियाली प्रवद्र्धन कार्यक्रम अन्तर्गत ६ लेन सडक क्षेत्रमा सौन्दर्यता भएको उनको प्रतिक्रिया छ ।

नगरपालिकाका वातावरण तथा विपद् व्यवस्थापन शाखा प्रमुख युवराज पन्थीका अनुसार नगरपालिकाका १७ वटै वडामा सरसफाईकर्मी खटाएर फोहोर व्यवस्थान गर्ने गरिएको छ । ६ लेन सडक क्षेत्रमा करिव पाँच सय वटा विभिन्न प्रकृतिका विरुवाहरु रोपिएको पन्थीले जानकारी दिए ।