खोज

बुटवल, ६ चैत ।

शहरी क्षेत्रमा क्रियापुत्री बस्न सहजता हुने गरी दिपनगरमा सामुदायिक किरियापुत्री भवन निर्माण गरिएको छ । संगम कालिकाको अगुवाईमा बुटवल उपमहानगरपालिकाको सहयोगमा भवन निर्माण भएको हो । नगरपालिकाबाट ३ किस्तामा गरी १४ लाख रुपैयाँ, स्थानीय समाजसेवीहरुबाट १३ लाख रुपैया रुपैयाँ गरी कुल २७ लाख खर्चमा सुविधासम्पन्न ३ कोठा भवन निर्माण भएको निर्माण समितिका अध्यक्ष मान प्रसाद सुवेदीले बताए । शहरी क्षेत्रमा बसोबास गर्नेहरु आफन्तको मृत्युको पिडासंगै कोठा अभाव हुनेहरुलाई न्युनतम सुल्क लिएर सेवा दिने उनले बताए । करिब १ विगाहा क्षेत्रफलमा रहेको सार्वजनिक जग्गामा भवन निर्माण गरिएको हो ।

एक समारोहका बीच बुटवल उपमहानगरपालिकाका नगरप्रमुख खेलराज पाण्डेयले सोमबार भवनको उदघाटन गर्दै स्थानीय सरकार र समुदायको पहलमा नमुना काम भएको बताए । सामाजिक रुपान्तरणका लागि सबैको सहकार्य जरुरी रहेको उनले बताए । शहर उन्मुख नगरलाई मानवताको पहिचान दिने गरी स्थानीयबाट गरिने काममा पालिकाबाट निरन्तर सहयोग हुने प्रतिवद्घता जनाए ।

कार्यक्रममा निर्माण समितिका सचिव हेम बहादुर बिश्वकर्माले वि.सं. २०७७ सालमा शुरुवात गरेर दुई वर्षमा तयार भएको बताए । संगम र कालिका टोल मिलेर भवनको निर्माण गरिएको उनले बताए ।

कार्यक्रममा बुटवल उपमहानगर वडा नं ७ का निवर्तमान अध्यक्ष कमलप्रताप थापा, वडा सदस्य राधिका पौडेल, चादबारी प्रहरी बिटका प्रमुख खगेन्द्र पराजुली, कलाकार शान्ताराम गिरि, भवन निर्माण समितिका उपाध्यक्ष शारदा खड्का, सल्लाहकार मोति श्रेष्ठ, रवि गौचन, सहसचिव प्रकाश क्षेत्री, कोषाध्यक्ष चन्द्र गुरुङ, भवन निर्माण अनुगमन समितिका संयोजक टेक राज पन्थीले सानोसानो सहयोग जुटाएर भवन निर्माण गर्न सफल भएको बताए । कार्यक्रममा भवन निर्माणमा सहयोग गर्ने जनप्रतिनिधि, दाताहरुलाई सम्मानपत्र समेत वितरण गरिएको थियो ।