खोज

बुटवल, १ चैत ।

बुटवलमा सम्पन्न सयपत्री सेभेन ए साईड कप नकआउट फुटबल प्रतियोगिता २०७९ को उपाधि नयाँ जन्म एफसी, चरङेले चुमेको छ । रामनगर खेलमैदान बुधबार भएको फाईनल खेलमा सिम्रिक युवा क्लब, बुटवललाई २–१ गोल अन्तरले पराजित गर्दै नयाजन्मले उपाधि चुमेको हो । उपाधिसंगै उसले नगद ५० हजार रुपैयाँ, कप, मेडल, प्रमाणपत्रबाट पुरस्कृत भएको छ । उपविजेता सिम्रिक भने २५ हजार रुपैयाँ नगद सहित कप, मेडल, प्रमाणपत्रमा चित्त बुझायो । प्रतियोगितामा नयाजन्मका जितेश गुरुङ सर्वोत्कृष्ट खेलाडी, नयाजन्मकै मोहन थापा आठ गोलसहित सर्वाधिक गोलकर्ता, सिम्रिकका हिमाल कार्की उत्कृष्ट गोलकिपर, सिम्रिककै निरज थापा उत्कृष्ट डिफेन्सबाट पुरस्कृत भए ।

रामनगर खेलमैदानमा भएको खेलको १० औ मिनेटमा सिम्रिकका मिलन आलेले गोल गर्दै टिमलाई खेलमा अग्रता दिलाए । नया जन्मका सुभाष तामाङले १८ औ मिनेटमा बराबरी गोल गरे । दोेस्रो हाफको ५८ औ मिनेटमा नयाजन्मका क्याप्टेन सुरज घलानले विजयी गोल गरे।

एक समारोहका बीच प्रदेश खेलकुद परिषद लुम्बिनीका सदस्य सचिव जयप्रकाश भट्टराई, बुटवल उपमहानगरपालिका वडा नं. १० का वडाअध्यक्ष बल बहादुर पुन (बलु), रुपन्देही जिल्ला फुटबल संघका अध्यक्ष लोक पुन, जनप्रतिनिधि यमुना काउचा, मीन सारुले विजेता, उपविजेता तथा उत्कृष्ट खेलाडीहरुलाई पुरस्कार वितरण गरेका छन् ।

प्रदेश खेलकुद परिषद लुम्बिनीका सदस्य सचिव जयप्रकाश भट्टराईले बुटवलको फुटबल विकासमा ईतिहास बोकेको सयपत्री गर्विलो क्लब भएको बताए । निजी क्षेत्रबाट फुटबल खेलाडी उत्पादनमा योगदान दिन सफल भएको रामनगर मैदान र क्लबको योगदानप्रति सरकारको उचित मूल्यांकन गर्ने उनले बताए । खेलकुद विकास गर्न ग्रास रुट लेभलमा विद्यालयस्तरबाट विकास गर्न जरुरी रहेको उनले बताए । देशमा अझै पनि ऐनकानुन, पुर्वाधार अभाव जस्ता धेरै समस्याबाट खेलकुद ग्रजिरहेको उनले दुः खेसो गरे ।

बुटवल उपमहानगरपालिका वडा नं. १० का वडाअध्यक्ष बल बहादुर पुन (बलु) ले स्थानीय सरकारबाट आफ्नो क्षमता अनुसार खेल विकासमा लागेको बताए । नगरमा पहिलोपटक खेलाडीहरुलाई नगदसहित सम्मानको कार्यक्रम चलाएको उनले दाबी गरे । ग्रास रुट लेभलबाट नै खेल विकासमा आफू लागेको उनले बताए ।

कार्यक्रममा क्लबका सल्लाहकार छत्र बहादुर गुरुङले एन्फाको वार्षिक तालिकामा रहेको राष्ट्रिय लिग संचालन हुन नसकेको अवस्थामा देशभरमा चल्ने प्रतियोगिताबाट खेलाडीहरुलाई अभ्यासमा सहयोग मिल्ने बताए ।

सरकारबाट खेलाडीहरुलाई प्रोत्साहन गर्न नसक्दा देशका राष्ट्रिय खेलाडी विदेश पलायनको वर्तमान अवस्था रोक्न योजना ल्याउन पर्ने सुझाव दिए । खेल पूर्वाधारको अभाव देशमा सबैभन्दा समस्याका रुपमा देखापरेको उनले बताए । क्लबका अध्यक्ष विशाल काउचा, क्लबका उपाध्यक्ष खोम बहादुर पुन, सचिव सन्तोष गुरुङले शारीरिक शिक्षा अतिरिक्त नभई अनिवार्य विषय बनाउनुपर्ने कुरालाई जोड दिनुपर्ने बताए ।