खोज

बुटवल, १ चैत ।

निर्मल लामा स्मृति प्रतिष्ठानले बुटवलको आम्दा नेपाल सिद्धार्थ बाल तथा महिला अस्पताल र भैरहवाको भिम अस्पतालमा आईसियु बेड हस्तान्तरण गरेको छ ।

प्रतिष्ठानको तर्फबाट बुधबार भूमि व्यवस्था, सहकारी तथा गरिबी निवारणमन्त्री शशी श्रेष्ठ र प्रतिष्ठानका अध्यक्ष एवं नेकपा (माओवादी केन्द्र) का नेता डा. लीलामणि पोख्रेलले बुटवल र भैरहवामा बुधबार छुट्टाछुट्टै कार्यक्रमको आयोजना गरी बुटवलको आम्दा अस्पताल १२ र भैरहवाको भिम अस्पतालमा १० गरी २२ थान आईसियु बेड हस्तान्तरण गरेका हुन् ।

कार्यक्रममा निर्मल लामा स्मृति प्रतिष्ठानका अध्यक्ष रहेका माओवादी केन्द्रका नेता लिलामणी पोखरेलले शिक्षा र स्वास्थ्य जनताको मौलिक अधिकार भएकोले सबैले निःशुल्क पाउने व्यवस्था मिलाउनु पर्नेमा जोड दिँदै पैसा हुनेले स्वास्थ्य र शिक्षा किन्ने प्रणालीको अन्त्य गरी आमजनताले शिक्षा र स्वास्थ्यमा नैसर्गिक हकको प्रयोग गर्न पाउनुपर्ने बताएका छन् ।

त्यस्तै प्रतिष्ठानका उपाध्यक्ष निवर्तमान भूमि व्यवस्था, सहकारी तथा गरिबी निवारण मन्त्री शशी श्रेष्ठले आफ्नो छोरा डा. बिप्लपमणि पोख्रेलको पहलकदमीमा चिनियाँहरुको सहयोगमा बेड ल्याएको बताईन् उनले बास्तविक भुई मान्छेहरुले जीवनस्तर र स्वास्थ्यलाई सुधार ल्याउन प्रतिष्ठान सधै प्रतिबद्ध रहने बताईन् ।

त्यस्तै, आम्दा अस्पतालका पूर्व निर्देशक डा. विनोद पराजुलीले विभिन्न सामाजिक संस्थाहरुको सहयोगबाट नै स्वास्थ्य क्षेत्रमा धेरै स्तरोन्नती भएको बताउँदै मानवीय स्वास्थ्यमा राम्रो सेवा प्रवाह गरेकोमा उच्च मूल्यांकन स्वरुप प्रतिष्ठानले आम्दा अस्पताल रोजेकोमा धन्यवाद सहित खुसी व्यक्त गरे । अस्पतालका मेसु राजेन्द्र बस्यालले अन्य अस्पतालको तुलनामा आम्दा अस्पतालले न्यूनतम चार्जमा सेवा प्रवाह गरेको बताउँदै प्रतिष्ठानले दिएका बेड तत्काल सञ्चालनमा ल्याउने बताए ।

कार्यक्रममा आम्दा अस्पतालका अध्यक्ष तथा बुटवल उपमहानगरपालिकाका मेयर खेलराज पाण्डे, प्रतिष्ठानका केन्द्रीय सचिव तथा पूर्वराज्य मन्त्री हक्कि कुल्ला खाँ, अस्पतालका मेसु राजेन्द्र बस्याल र प्रतिष्ठान रुपन्देही शाखाका अध्यक्ष गंगालाल प्रधान लगायत अस्पतालका कर्मचारीहरु र प्रतिष्ठान रुपन्देही शाखाका पदाधिकारीहरुको उपस्थिति रहेको थियो ।