खोज

दाङ, २८ फागुन ।

पत्रकारहरुले खोजमूलक समाचार लेख्न सकेमा पेसामा निरन्तरता दिन सकिने एक कार्यक्रमका सहभागीले बताएका छन् । सञ्चारिका समुह लुम्बिनी प्रदेश र आन्तरिक मामिला तथा सहकारी मन्त्रालय लुम्बिनी प्रदेशको आयोजनामा शनिबारदेखि घोराहीमा भएको कार्यक्रमका सहभागीले यस्तो धारणा राखेका हुन् ।

पत्रकार महिलाहरु क्षमता विकासको लागि खोजमुलक समाचार लेखन तालिम दाङको घोराही शुरु भएको छ । सञ्चारिका समूह लुम्बिनी प्रदेशका अध्यक्ष अमृता अनमोलले महिला पत्रकारहरुको लेखन क्षमतालाई अभिवृद्धि गर्ने उद्देश्यले कार्यक्रमको आयोजना गरिएको बताइन् । पत्रकार महिलाहरु पछिल्लो समय पारिवारिक कारण तथा सञ्चारगृहबाट समयमा पारिश्रमिक नपाउँदा पेशाबाट पलायन हुने तितो यथार्थ रहेकाले खोजी समाचारले पेसामा टिकिरहन सकिने बताइन् । उनले सञ्चारिका समुहले लेख्ने पत्रकार महिलाहरुको लागि अवसर सिर्जना समेत गरिदिएको बताइन् ।

सञ्चारिका समुहले दाङमा आयोजना गरेको खोज पत्रकारिता तालिममा पत्रकार महासंघ दाङका अध्यक्ष दुर्गालाल केसीले पत्रकारिताका विविध विषयमा प्रशिक्षण दिएका थिए । उनले स्थानीय तहमा भएका समाचार विषयको बारेमा जानकारी गराएका थिए । समाचार लेख्नु पूर्व विषयक छनोट गर्नुपर्ने, अध्ययन गर्नुपर्ने र समाचार पढ्ने बानीको बिकास गर्नुपर्ने बताए । अध्ययन बिनाको लेखाइ उत्कृष्ट नहुने भएकाले यतातिर ध्यान दिन उनले आग्रह गरे । खोजमूलक विषयवस्तुमा रहेर समाचार संकलन गरेमा पाठक र स्रोताको रुचिको विषय हुने उनले बताए ।

कार्यक्रममा सञ्चारिका समूहका लुम्बिनी प्रदेश सल्लाहकार नारायणी रजौरेले स्थानीय तहमा खोजी गर्न सकिने समाचारका विषयका वारेमा जानकारी गराएकी थिइन् । उनले एकपटक लेखेको समाचारको फलोअप पनि गर्नु पर्ने बताइन् । पत्रकार महिलालाई चुनौती भएपनि आवसर रहेको उनले बताइन् ।

पत्रकारिता क्षेत्रमा महिलाहरुको क्षमता विकास र लेखनमा अभिवृद्धि गराउने सो खोजमुलक तालिममा दाङ, रोल्पा र प्युठानका २५ जना पत्रकार महिलाहरुको सहभागिता रहेको छ ।