खोज

बुटवल, २६ फागुन ।

बुटवलमा जारी सयपत्री सेभेन ए साईड कप नकआउट फुटबल प्रतियोगिता २०७९ अन्तर्गत शुक्रबार ४ वटा खेलहरु भएका छन् । सयपत्री युवा क्लबको आयोजनामा रामनगर खेलमैदानमा भएको तेस्रो दिनको प्रतियोगितामा स्कर्लस होम एकेडेमी, ईन्टर स्पोर्ट्स क्लब, हन्टर ब्याईज र चरङे विजयी भएका छन । स्कलर्स होमले शिवपुर एफसीलाई २–० गोल, ईन्टर स्पोर्ट्स क्लबले तिलोत्तमा एफसीलाई १–०, हन्टर ब्याईज एफसीले हिमाल एफसीलाई टाईबेकर तथा चरङे एफसीले चटाके ब्याईज एफसीलाई २–० गोल अन्तरले पराजित गर्दै दोस्रो चरणमा प्रवेश गरेका छन् ।

पहिलो खेलमा स्कलर्स होम एकेडेमीका अस्मान क्षेत्रीले खेलको पाँचौ मिनटमा गोल गर्दै टिमलाई अग्रता दिलाए । पहिलो हाफ १–० गोल अन्तरले पछि परेको शिवपुर एफसी दोस्रो हाफमा थप गोल खान पुग्यो । स्कलर्सका सुसान जिएमले खेलको २५ औ मिनेटमा गोल थपे । यसैगरी दोस्रो खेलमा ईन्टर स्पोर्ट्स क्लबले तिलोत्तमा एफसीलाई पराजित गरेको छ । खेलको ३० औ मिनेटमा पाएको पेनाल्टीलाई सदुपयोग गर्दै निरज थापाले विजयी गोल गरेका थिए ।

प्रतियोगिताको उपाधि विजेता टिमले नगद ५० हजार रुपैयाँ, कप, मेडल, प्रमाणपत्र तथा उपविजेता टिमले नगद २५ हजार रुपैयाँ सहित कप, मेडल, प्रमाणपत्रबाट पुरस्कृत गरिने संयोजक सन्तोष गुरुङले बताए । यसैगरी विधागत उत्कृष्ट खेलाडीहरुलाई समेत पुरस्कृत गरिने उनले बताए । शनिबार पहिलो चरणका ४ र दोस्रो चरणका १ खेलहरु हुने छन् । चैत १ गतेसम्म चल्ने प्रतियोगितामा रुपन्देहीका २८ टिमले प्रतिष्पर्धा गरेका छन् ।