खोज

दाङ, २४ फागुन ।

लुम्बिनी प्रदेशका मुख्यमन्त्री लिला गिरीले १सय १३ औं अन्तराष्ट्रिय नारी दिनवसको अवसरमा देश, विदेशमा रहेका सम्पूर्ण नारीहरुलाई शुभकामना दिएका छन् । आज एक शुभकामना सन्देश जारी गर्दै मुख्यमन्त्री गिरीले नेपालको संविधानले लैङ्गिक भेदभावबिना राज्यका हरेक निकायमा समानुपातिक समावेशी सिद्धान्तको आधारमा सहभागी हुने हक सुनिश्चित गरेको उल्लेख गरिएको छ ।

आज अन्तराष्ट्रिय नारी दिवस ‘लैङ्गिक समानताको बलियो आधार ः सिर्जनात्मक प्रविधिमा महिलाको पहुँच बिस्तार’ भन्न्ो नारासहित विभिन्न कार्यक्रम गरी मनाइँदै छ । महिला अधिकार, सशक्तिकरण र आत्मसम्मान प्राप्तिको ठूलो उत्सवका रुपमा विश्वभर मनाइदै आइएको छ । नेपालमा आजको दिनलाई राजनैतिक चेतना र जागरण बिस्तारको महाअभियानका रुपमा पनि मनाइदै आइएको मुख्यमन्त्री गिरीले स्मरण गरेका छन् ।

जहाँनिया राणा शासन, निरकुंश पञ्चायती शासन व्यवस्था र शाही शासनको कठीन अवस्थामा प्रजातान्त्रिक अधिकार प्राप्तिका लागि नेपाली महिलाहरुले गरेको संघर्ष अविस्मरणीय छ । महिला आन्दोलन केवल महिला अधिकार र समानताको लडाईमा मात्रै सीमित नभएर लोकतान्त्रिक आन्दोलनको फराकिलो दायरामा विस्तार भएको थियो । लोकतान्त्रिक आन्दोलनको दायरालाई फराकिलो बनाउन र उत्कर्षमा पु¥याउन नारी दिवसको अवसरमा आयोजना भएका कार्यक्रमले महत्वपूर्ण भूमिका खेलेको स्मरण गर्दै महिलाहरुको सक्रियता, जुझारुपन र अठोटको हार्दिक सम्मान व्यक्त गरेका छन् ।

विगतमा भएका आन्दोलन र संघर्षबाट नै संविधानमा महिला अधिकारका विषयलाई समेट्न सम्भव भएको भन्दै मुख्यमन्त्री गिरीले राज्यको माथिल्लो तहदेखि तल्लो तहसम्मका सबै संरचनामा महिलाको समानुपातिक प्रतिनिधित्व हुने संवैधानिक व्यवस्था रहेको बताएका छन् । उनले विगतका संघर्षबाट प्राप्त उपलब्धीको सही प्रयोग गरेर समतामुलक र समावेशी नेपाली समाज निर्माणको अभियानमा अघि बढ्न आह्रान गरेका छन् ।

अझै नेपाली महिला कथित बोक्सी, छाउपडी र दाइजो जस्ता कुप्रथाका नाममा पीडित भएको अवस्था रहेको भन्दै उनले यसको अन्त्य गर्नुपर्नेमा जोड दिएका छन् । संविधानको सफल कार्यान्वयन गर्दै महिलाको सुरक्षा, सम्मान र रोजगारीको आधार खडा गर्दै समृद्ध नेपाल निर्माणको महाअभियानमा सबै एकताबद्ध भई अघि बढ्न उनले सबै राजनैतिक दल, संघसंस्था र आम नागरिकमा हार्दिक अपिल गरेका छन् ।