खोज

बुटवल, २० फागुन ।

शकरनगर सामुदायिक वन, तिलोत्तमा (१–४) रुपन्देहीले आफ्नो २७ औं वार्षिकोत्सव वृहत रक्तदान कार्यक्रम गरी मनाएको छ । कार्यक्रमको एक समारोहका बीच तिलोत्तमा नगरपालिकाका नगरप्रमुख रामकृष्ण खाँणले उद्घाटन गर्दै समुदायलाई संगठित गर्दै आफ्नो क्षेत्रको वन संरक्षणमा सामुदायिक वन समुहको महत्वपूर्ण योगदान रहेको बताए ।

मानवीय सेवामा उपयोग हुने गरी गरिएको रक्तदान जस्तो पुण्य कार्य अझ त्यसमा उदाहरणीय भएको उनको दाबी छ । रुपन्देही जिल्लामा तिलोत्तमा नगरका बासिन्दालाई निःशुल्क रगतको ब्यवस्था गरेको समेत उनले बताए । समाजका अगुवाहरुको प्रयासबाट वन जंगल र जमिन संरक्षण भएको भन्दै आर्थिक विकास र समृद्धिसंग वनलाई जोड्ने गरी कार्यक्रम ल्याउन सुझाव दिए ।

कार्यक्रममा उपप्रमुख जागेश्वरी देवी चौधरीले संघसंस्थाहरुको कोष बृद्धिसंगै स्थानीय जनतालाई बढीभन्दा वढी सेवा सुविधा दिनेतर्फ जोड दिनुपर्ने बताईन् । नाम अनुसार नै सामुदायिक वन, खानेपानी जस्ता संस्थाहरु जनतालाई सहुलियत मुल्यमा सेवा दिनुपर्ने बताईन् । बि.सं २०५२ साल फागुन २० गते जिल्ला वन कार्यालय रुपन्देहीमा दर्ता भई जिल्लाको पहिलो सामुदायिक वन बन्न सफल शकरनगर सामुदायिक वनले वार्षिकोत्सवको अवसरमा सामाजिक उत्तरदायित्व र मानवीय सेवा अन्तर्गत रचनात्मक कार्यक्रम गर्दै आएको समूहका अध्यक्ष रबिन्द्र वस्नेतले बताए । सामुदायिक वनको संरक्षण र दिगो विकासका लागि अग्रजहरुको महत्वपुर्ण भूमिका रहेको उनले वताए ।

कार्यक्रममा समूहका संस्थापक अध्यक्ष केशवराज न्यौपाने, उपाध्यक्ष कमला ज्ञवाली र सचिव कालिका अधिकारीले सामुदायिक वन संरक्षणमा धेरै चुनौतीहरु आईपरेको भन्दै भूमाफियाहरुबाट हडप्न खोजेको ८२ विगाह जग्गा जोगिएको बताए । वनको संरक्षण, दिगो विकास र चोरी निकाशी नियन्त्रणका लागि सवैको साथ र सहयोग आवश्यकपर्ने उनीहरुको सुझाव छ । नेपाल रेडक्रस सोसाईटी, रक्त सञ्चार केन्द्र बुटवलको प्राविधिक सहयोगमा भएको रक्तदान कार्यक्रममा ६८ युनिट रगत संकलन भएको समूहका सदस्य मिनप्रसाद देवकोटाले बताए । वन क्षेत्र ५ सय ८४ हेक्टर क्षेत्रफलमा फैलिएको छ ।