खोज

बुटवल, २० फागुन ।

भुवनेश्वरी टोलमा जेष्ठ नागरिक विश्राम स्थल भवन निर्माण गरिएको छ । टोलमा बसोबास गर्ने वृद्धवृद्धाहरुलाई लक्षित गरी भुवनेश्वरी मन्दिर नजिक करीब एक कठ्ठा जग्गालाई ब्यवस्थित गरी दुई तला हलसहितको भवन निर्माण गरिएको हो ।

शनिबार एक समारोहका बीच वडा नं ४ का वडाअध्यक्ष नरेश्वर शर्मा पौडेलले भवनको उदघाटन गर्दै समुदायको हितमा उपयोग हुने गरी भवन निर्माण गरिएको बताए । फोहोर फाल्ने ठाउँलाई ब्यवस्थित गरी भवन बनाईएको उनले दाबी गरे । ‘सामुदायिक भवनमा सबैको अपनत्व हुनुपर्छ ।’– उनले भने । बुटवल उपमहानगरपालिका, स्थानीय टोल संस्था र समाजसेवीहरुको सहयोगमा भवन निर्माण गरिएको उनले बताए । घरघरमा एक्लोपनामा रहेका वृद्धवृद्धाहरु दिउँसो भेटेर भलाकुसारी गर्ने, नाचगान गर्ने र रचनात्मक कार्यमा भवन उपयोगी हुने उनको दाबी छ ।

कार्यक्रममा टोलका ८७ वर्षीय खड्ग बहादुर पुन, ९५ वर्षीय सरुमा बलाल र ९५ वर्षीय सस बहादुर तरामुलाई सम्मान गरिएको थियो । कार्यक्रममा अनुगमन समितिका संयोजक ईन्द्र बहादुर थापाले वडाकै नमुना काम गर्न सफल भएको बताए । फोहोर फाल्ने, लामखुट्टे लाग्ने सार्वजनिक क्षेत्रलाई संरक्षण गरी ३ वर्षको अवधिमा भवन निर्माण पूरा भएको उनले बताए ।

उपमहानगरपालिकाबाट २० लाख रुपैयाँ, भुवनेश्वरी टोल विकास संस्थाबाट ४ लाख ७१ हजार, राना रेवती पथ आमा समूहबाट १ लाख ५० हजारसहित टोलका सामाजिक ब्यक्तिहरुबाट करीब ३३ लाख रुपैयाँ लागतमा भवन निर्माण सम्पन्न भएको कोषाध्यक्ष मधुबाला तारामी मगरले बताईन् । करिब ३१ लाख बराबर सहयोग संकलन भएकोमा ३३ लाख ५ सय ८९ रुपैयाँ खर्च भएको उनले बताईन् । कार्यक्रममा जेष्ठ नागरिक विश्राम स्थल निर्माण उपभोक्ता समितिका अध्यक्ष पदम बहादुर राना, टोल अध्यक्ष रबिन्द्र नाथ पंगेनी, नागरिक वडा मंचका दुर्गा पौडेल, जनप्रतिनिधि पुनम थापाले थप रचनात्मक कार्यमा सबै मिलेर लाग्ने प्रतिवद्धता जनाए ।