खोज

कन्चन, १६ फागुन ।

नेकपा एमाले रुपन्देही मिसन ग्रासरुट अभियान सञ्चालन गर्ने निर्णय अनुसार मंगलबार कञ्चन गाउँपालिका कमिटीको बिस्तारित बैठक बिभिन्न निर्णय गर्दै सम्पन्न भयो ।

कार्यक्रममा एमाले केन्द्रीय सदस्य बोम बहादुर विश्वकर्माले एमाले संसदमा दोस्रो पार्टी देखिएता पनि जनताको भोटले पहिलो पार्टी रहेको बताउँदै एमाले नेतृत्वको सरकारले गरेका दीर्घकालीन बिकासका योजना जनताको माझमा लैजानुपर्नेमा जोड दिए ।

नेकपा एमाले जिल्ला कमिटी अध्यक्ष तेजेन्द्र केसीले एमाले रुपन्देहीमै बलियो पार्टी रहेको बताउदै स्थानीय चुनाव समग्रमा एमालेले राम्रो नतिजा हासिल गरेको बताए । पार्टी जिल्ला उपसचिव चित्र बहादुर कार्की, प्रदेश कमिटी सदस्य हरिबहादुर कार्की, सूर्य बहादुर भट्टराईलगायतले अहिलेको अबस्थामा एमालेको नेतृत्व जनताले चाहेको भएता पनि देशी बिदेशी इसारामा अहिले प्रचण्ड नेतृत्व चलिरहेकोले एमाले सरकारबाट बाहिरिनु परेको र आगामी दिनमा संसदको पहिलो दल हुने गरी नेता कार्यकर्ता लाग्नुपर्नेमा जोड दिए । त्यस अवसरमा जिल्ला कमिटी सदस्य तथा कञ्चन इन्चार्ज भरतमणी सापकोटले कञ्चनमा नेकपा एमाले एक ढिक्का रहेको बताए । फागुन ३० गते बिस्तारित बैठक राखी कञ्चनमा नेकपा एमाले बिस्तारित र सुदृढीकरण सञ्चालन गर्ने र चैत १० गते पार्टीको प्रशिक्षण गर्ने, वडामा जिम्मेवारीमा रहेका नेता कार्यकर्ताहरुको उपस्थितिमा अभियानलाई सार्थक बनाउन बैठक सञ्चालन गर्ने निर्णय गरेको छ ।

प्रदेश सल्लाकार, जिल्ला सल्लाहकार, जेष्ठ कम्युनिष्ट मञ्च, पालिका कमिटीका पदाधिकारी सदस्यहरु तथा त्यस वडाबाट प्रतिनिधित्व गर्ने सबै जनसंगठनका सदस्यहरुको अनिवार्य उपस्थितिमा बैठक सञ्चालन गर्ने निर्णय गरेको छ । कार्यक्रममा नेकपा एमाले कञ्चन गाउँकमिटी अध्यक्ष दिननाथ आचार्य, सचिव लेखनाथ पौडेललगायतले पनि बोलेका थिए ।