खोज

दाङ, १५ फागुन ।

महिलाको स्वास्थ्यसंग प्रत्यक्ष सरोकार रहेको प्रजनन स्वास्थ्य सबैको साझा हुनु पर्ने भौतिक पूर्वाधार विकास मन्त्री इन्द्रजीत थारुले बताएका छन् । लुम्बिनी प्रदेश सरकार स्वास्थ्य मन्त्रलायको आयोेजना र संचारिका समुह नेपाल लुम्बिनी प्रदेशको सहकार्यमा आइतवार दाङको लमहीमा भएको कार्यक्रममा यस्तो धारणा राखेका हुन् ।

मन्त्री थारुले नागरिक स्वस्थ भए मात्र स्वास्थ समाजको कल्पना गर्न सकिने भएका कारण सरकारले अन्य स्वास्थ्यका कुरालाई जस्तै प्रजनन स्वास्थ्यलाई पनि प्राथमिकता राख्नु पर्ने बताए । उनले हरेक स्थानीय तहमा स्वास्थ्य र शिक्षा निःशुल्क हुनुपर्ने बताए । स्थानीय, प्रदेश र केन्द्र सरकारले स्वास्थ्यलाई प्राथमिकतामा राखेर काम गर्नु पर्ने उनको धारणा थियो । “जनताको आवाजलाई वुलन्द पार्ने र जन दबावका लागि पत्रकारले खवरदी गर्नुपर्छ”, उनले भने ।

सोही कार्यक्रममा लुम्बिनी प्रदेश सभा सदस्य लोका बिकले लक्षित वर्गको क्षेत्रमा स्वास्थ्यको पहुँच नपुगेको बताइन् । घर घरको सरकार स्थानीय सरकारले यसमा विशेष ध्यान दिन आग्रह गरिन् । नागरिकको स्वास्थ्य क्षेत्रमा आफूले सधै काम गर्ने प्रतिबद्धता उनले जनाइन् ।

अर्का प्रदेश सभा सदस्य सीता चौधरीले महिलाको स्वास्थ्यसंग प्रत्यक्ष जोडिएको कुराको बारेमा खुलेर बोल्ने र बहसका कार्यक्रम निरन्तर हुनुपर्ने बताइन् । समाजका कुरालाई सम्वोधन हुने गरी आफ्नो भूमिका रहने उनको भनाइ थियो ।

पूर्व सभासद दामा शर्माले स्वास्थ्यको क्षेत्रमा पर्याप्त कर्मचारी नहुँदा प्रभावकारी काम हुन नसकेको बताइन् । यसको समाधानमा प्रदेश सरकारले पहल गर्नु पर्ने उनको धारणा थियो । दरवन्दी थपेर भएपनि सेवा सुविधा दिनुपर्नेमा उनले जोड दिइन् । प्रजनन् स्वास्थ्यका विषयमा पत्रकारले निरन्तर खवरदासी गर्नु पर्ने र यो विषयमा वहस निरन्तर हुनुपर्ने उनले बताइन् । स्वास्थ्य मन्त्रालयका नरसिङ निरिक्षक सुनिता ज्ञवालीले विषयबस्तुको वारेका जानकारी गराएकी थिइन् । संचारिका समुह लुम्बिनी प्रदेश अध्यक्ष पत्रकार अमृता अनमोलले पत्रकारले प्रजनन स्वास्थ्यका वारेमा कलम चलाउन पर्ने विषयमा जानकारी गराइन् ।

जनस्वाथ्य कार्यालय दाङका निमित्त प्रमुख डम्वरबहादुर कुँवरले दाङका स्थानीय तहमा भएका वर्थिङ सेन्टरमा सबैभन्दा राम्रो काम गरेको राप्ती गाउँपालिका र सबैभन्दा कमजोर राजपुर गाउँपालिका रहेको जानकारी दिए । कार्यक्रममा महिला अधिकारकर्मी, जनप्रतिनिधि र पत्रकार महिलाको सहभागिता रहेको थियो ।