खोज

बुटवल, १४ फागुन ।

मर्चवारका बासिन्दाहरुलाई स्वस्थ्य सचेतनासंगै सेवा दिने उद्देश्यका साथ एक दिने निःशुल्क स्वस्थ्य शिविर, सचेतना तथा औषधी वितरण कार्यक्रम गरिएको छ । लुम्बिनी अटोमोबाईल्स एशोसिएशन अफ नेपाल नाडा (लुम्बिनी) को आयोजना तथा सिद्धार्थ महिला तथा बाल अस्पताल आम्दा नेपालको प्राविधिक सहयोगमा समरीमाई गाउँपालिकाको जनता मावि बिजरौलीमा शनिबार निःशुल्क स्वस्थ्य शिविर, सचेतना तथा औषधी वितरण गरिएको हो । लुम्बिनी प्रदेश स्वस्थ्य तथा जनसंख्या मन्त्रालयका स्वस्थ्यमन्त्री विष्णु प्रसाद पन्थीले डा राजेन्द्र प्रसाद बश्याललाई स्वस्थ्य सामग्री हस्तान्तरण सहित शिविरको उद्घाटन गर्दै रुपन्देही विकट क्षेत्र मानिने मर्चवारमा आवश्यकता अनुसार राम्रो कार्य भएको बताए । विकासमा पछि परेको सो क्षेत्रमा शिक्षा, स्वस्थ्य, सरसफाईको क्षेत्रमा सामाजिक संघसंस्थाहरुको योगदान महत्वपूर्ण हुने उनको दाबी छ । सरकारलाई झकझकाउने गरी निरन्तर सामाजिक संघसंस्थाहरु लाग्नुपर्ने उनले सुझाव दिए ।

कार्यक्रममा लुम्बिनी नाडाका अध्यक्ष गणेश भट्टराईले आफनो पेशा ब्यवसायसंगै सामाजिक उत्तरदायित्वमा समेत नाडा सधै अग्रसर रहेको बताए । वार्षिक कार्ययोजना अनुसार स्वस्थ्य सचेतनाको कार्यक्रमलाई रुपन्देही जिल्लाकै बिकट मानिने मर्चवारमा लगेर कार्यक्रम गरेको उनले बताए । शिविरमा स्त्री रोग विशेषज्ञ डा राजेन्द्र प्रसाद बश्याल, फिजिसियन डा केशव शर्मा, बालरोग अरुण पोखरेल, आम्दा नेपालका आकस्मिक सेवा प्रमुख श्रीकान्त सुवेदी लगायत एक दर्जन बढी प्राविधिकहरुबाट सेवा दिइएको थियो । शिविरमा करीब ९ लाख रुपैया बराबरको औषधी र सेवा दिईएको उनले बताए ।

शिविरमा आएका बिरामीहरुमध्ये अधिकाशमा महिलामा पाठेघरको समस्या, बच्चाहरुमा रुघाखोकी, दम पाईएको चिकित्सकहरुले बताए । उनीहरुलाई थप सेवाका लागि समेत परामर्श दिईएको थियो ।

कार्यक्रममा सम्मरीमाई गाउँपालिका प्रमुख विनोद कुमार श्रीवास्तव, उपप्रमुख प्रियंका शाही सिह, निमित्त प्रमुख प्रशासकीय अधिकृत मुन्सी प्रसाद माझी, नाडा अटो मोबाईल डिलर्स एशोसियसन नेपालका सहसचिव पंकज अग्रवाल, जनता मावि ब्यवस्थापन समितिका अध्यक्ष राजाराम धोबी, प्रधानाध्यापक मखन लोध, एमआर वसन्त पोखरेलले सरकारी सेवाबाट ओझेलमा परेका क्षेत्रमा ब्यवसायिक संघसंस्थाहरु समेत सामाजिक उत्तरदायित्व निवार्ह गर्दै गाउघरमै सेवा पाउनु उत्कृष्ट कार्य भएको बताए ।
कार्यक्रम संयोजक नाडा लुम्बिनीका सचिव राम प्रसाद बेल्बासेले स्थानिय आठ सय बढी बिरामीहरु सेवा लिएको बताए ।