खोज

बुटवल, १३ फागुन ।

राष्ट्रपति रनिङशिल्ड प्रतियोगिताको १२ औ संस्करणमा लुम्बिनी च्याम्पियन हो । निशा चौधरीको ४ स्वर्णसहित ३ नयाँ रेकर्डसंगै एथ्लेटिक्समा प्रदेशका चार जना खेलाडीहरुले दुई–दुईवटा स्वर्ण पदक जितेका थिए । फागुनमा हुन गैरहेको १३ औ संस्करणको प्रतियोगिता दोहो¥याउने दाउमा लुम्बिनी प्रदेश लागेको छ ।

देशमा राजनीतिक परिवर्तन र सत्ताको बागडोरमा आएको उतारचढावसंगै पछिल्लो समय खेल गतिविधि सुस्ताएको छ । फागुन अन्तिममा काठमाडौमा प्रतियोगिता हुने भनिएको भएपनि जिल्ला छनौट खेल अझै शुरु भएका छैनन् । पालिकाहरुले भर्खर सक्दैछन् । बुटवल टुडे अनलाईन साथै बुटवल टुडे दैनिक पत्रिकामा समाचार प्रकाशनसंगै केही स्थानीय सरकारहरुले खेलकुद गतिविधिलाई चासो दिएर काम अघि बढाएका छन् । रुपन्देहीका १६ पालिकाहरुमध्ये सियारी र शुद्धोधन दुई गाउँपालिकाले समयमा नै छनौट खेल सकेका थिए । अन्य १३ पालिकामा शिक्षा तथा स्वस्थ्य महाशाखा अन्तर्गत प्रतियोगिता आयोजना सक्दैछ ।

रुपन्देहीको एक पालिका कोटहीमाई गाउँपालिका भने छनौट खेल गर्न नसक्ने बताएको रुपन्देही जिल्ला खेलकुद विकास समितिका अध्यक्ष भुपेन्द्र बहादुर क्षेत्री (हरि) ले बताए । ‘हामीले पटकपटक ताकेका गरेका छौ’–उनले भने । स्थानीय तहमा रहेको क्षमतावान र प्रतिभाशाली खेलाडी छनौटको आधार मानिने नियमित प्रतियोगिता समयमा नसक्नु दुःखद भएको उनले बताए । प्रतियोगिता आयोजना गर्न प्रत्येक पालिकाहरुलाई संघ सरकारमार्फत १–१ लाख रुपैयाँ उपलब्ध भएको उनले बताए । राष्ट्रपतिको जिल्लास्तरीय छनौट फागुनको १२ देखि १४ तथा प्रदेश छनौट १९ देखि २१ सम्म सक्नुपर्ने मिति तोकिएको छ ।

१३ औं राष्ट्रपति रनिङ शिल्ड प्रतियोगितामा छात्र÷छात्रा भलिबल, छात्र÷छात्रा कबड्डी हुने छ । यसैगरी एथ्लेटिक्सतर्फ छात्र÷छात्रा एक सय, दुई सय, ४ सय, ८ सय, १५ सय, ३ हजार मिटर दौड, ४ बाई एक सय मिटर र ४ बाई १५ सय मिटर रिले दौड खेल, उफ्रने र फ्याँक्नेमा हाईजम्प, लङजम्प, त्रिपलजम्प, ज्याभलिङ थ्रो (६ र ८ सय ग्राम), सटफुट (८ र १२ पाउण्ड), मार्शल आर्टमा छात्र÷छात्रा कराँते, तेक्वान्दो विभिन्न तौल समूहमा तथा उसुका खेलहरु समावेश छन् । ऐच्छिक रुपमा छात्र÷छात्रा फुटबल, रग्बी, ब्याडमिन्टन, टेबलटेनिस, क्रिकेट, आईटिएफ तेक्वान्दो समेत खेलाउन सक्ने प्रावधान रहेको छ ।

देशमा संघीयता आएपनि खेलकुदमा संघीयता कार्यान्वयन नभएको प्रदेश खेलकुद विकास परिषद लुम्बिनीका सदस्य सचिव जयप्रकाश भट्टराईको दुःखेसो छ । संरचनागत रुपमा केन्द्रिकृत रहेको जिल्लालाई प्रदेश अन्तर्गत ल्याउने, जिल्लाहरुमा पदाधिकारीहरु चयन लगायत धेरै कामहरु छोटो समयमा भएको भएपनि अधिकार र जिम्मेवारीकै बाँडफाँड, कार्यान्वयनमा धेरै चुनौतीहरु आईपरेको उनको बताए । नियमित क्यालेण्डरमा रहेर खेलकुद गतिविधिलाई निरन्तरता दिन ताकेता गरिरहेको उनले बताए ।

‘अघिल्लो वर्ष च्याम्पियन रहेको लुम्बिनी प्रदेशको साख जोगाउने चुनौती आईपरेको छ’–उनले भने । प्रदेशका १२ जिल्लामा तयारी तीब्र पारिएको उनले बताए । अघिल्लो वर्षभन्दा राम्रो तयारी रहेको प्रदेश खेलकुद विकास परिषद लुम्बिनीका सदस्य सचिव भट्टराईको दाबी छ । ‘प्रदेशका स्थानीय पालिका खेलमय भैरहेको छ’–उनले भने । अघिल्लो वर्ष सहभागिता नरहेको रोल्पाबाट खेलाडीहरु खेल्ने उनले बताए । स्थानीय पालिकाका नेतृत्वहरु तीब्र तयारीमा लागेको उनले बताए । खेलाडी छनौटको आधार ग्रासरुट चरण भएकाले पनि यसमा ध्यान दिनुपर्ने उनी बताउँछन् । जिल्ला छनौट चरणको खेलमा भने पाल्पाले मात्र सम्पन्न गरेको उनले बताए । ‘अन्यमा खेल जारी छ’–उनले भने ।