खोज

दाङ, १० फागुन ।

निर्माण कार्यको जिम्मेवारी लिएर लामो समय सडक निर्माण कार्य नसकेर लथालिङ्ग पारेको विरोधमा घोराहीका स्थानीयले फागुन १४ गतेसम्म काम सुचारु नगरे सडक कार्यालयमा तालाबन्दीदेखि चक्काजामसम्मको आन्दोलन गर्ने चेतावनी दिएका छन् ।

ट्राफिक चोकमा बुधबार गरिएको विरोध कार्यक्रम घोराही १४ स्थित सिद्धार्थ गौतमनगर टोलका अध्यक्ष चित्रकान्त आचार्य र बयलडाँडा चौतारी क्लवका अध्यक्ष नारायणप्रसाद भुसालको अगुवाईमा भएको हो ।

१४ गतेसम्म आफुहरुले उठाउँदै आएको जायज माग सुनुवाइ नभए जिल्ला प्रशासन कार्यालय घेराउ, सडक डिभिजन कार्यालयमा तालाबन्दी तथा चक्काजामसम्मको आन्दोलनका कार्यक्रम गरिने चेतावनी दिईएको छ ।

सडक निर्माण कार्य निर्माणमा भएको ढिलासुस्तीले अनाहकमा दुःख पाएको भन्दै पटक पटक ध्यानाकर्षण गराउँदा पनि काम सम्पन्न गर्नुको साटो सडक लथालिङ्ग पारेर अलपत्र पारेपछि स्थानीयले निर्माणकार्य चाँडो सम्पन्न गर्नतर्फ अग्रसरता बढाउन नभए फागुन १४ गतेपछि कडा आन्दोलनमाा उत्रिने चेतावनी दिएका छन् ।

२०७० सालदेखि निर्माण थालनी गरेर अहिलेसम्म पनि सडक निर्माणको काम सम्पन्न नगरी ठेकेदार कम्पनी बेपत्ता हुँदा पनि सडक डिभिजन कार्यालयले चासो नलिएर नागरिकलाई दुःख दिएको, निर्वाचनका बेला सडक पूर्वाधार, सुशासनलगायत सस्तो नारालगाएर जितेर केन्द्र र प्रदेशमा पुगेका सांसद मन्त्रीले नागरिकको दुःखमा साथ नदिएको तथा बढ्दो आर्थिक संकटका बेलामा पनि व्यवसायीका पक्षमा कुनै कुरा सम्बोधन नगरेको गुनासो गर्दै आन्दोलनमा उत्रिनु परेको दाङ जिल्ला उद्योग वाणिज्य संघका अध्यक्ष टंकसिंह बुढाथोकीले बताए । सडक पूर्वाधार निर्माणमा भएको ढिलाई र लापरवाहीले व्यवसायीलाई विभिन्न समस्या थपिनुका साथै मानव स्वास्थ्यमा पनि असर गरिरहेको बेलामा पनि सरकार मुकदर्शक भएको बताए ।

स्वर्गद्वारी यातायात व्यवसायीका वसन्त अधिकारीले जनतालाई ढाल बनाएर सत्तामा पुगेका नेताहरुले आफुले गरेका वाचा भुलेको बताए । सडक अस्तव्यस्त भएको बेलामा पनि चिल्ला गाडीमा हिड्ने नेताहरुले जनताको सास्ती भुलेको प्रति आक्रोश पोखे । सिस्नुपानी नेपालका अध्यक्ष डाक्टर लोकराज पराजुलीले नागरिकको पक्षमा नेताहरु गम्भीर बन्न नसक्दा व्यवस्था बदलिएपनि अवस्था बदलिन नसकेको बताए ।

यसअघि दवाव स्वरुप ८ गते सडक डिभिजन कार्यालयको मुल गेटमा तालाबन्दी गरेर कार्यालय प्रमुखसहित कर्मचारीलाई कार्यालय प्रवेशमा रोक लगाएका थिए । तर, मंगलबार बेलुकीसम्ममा निर्माण सामग्री झारेर काम सुचारु गरिने वचन दिएको अवस्थामा पनि काम नभएपछि आफुहरु थप संघर्षमा उत्रिनु परेको भुसालले बताए ।

घोराहीको कटुवाखोला देखि तुलसीपुरको चोक सडक पटक पटक म्याद भएर पनि काम नगर्ने ठेक्दारलाई म्याद गुज्रिएको लामो समय भई सक्दा पनि कारवाही नगर्ने, काम पनि नगर्ने अवस्थाको अन्त्य गर्दै अबिलम्ब सडक निर्माण र मर्मत कार्य अघि बढाउन दवाव दिईएको छ ।

विरोध कार्यक्रममा दाङ जिल्ला उद्योग वाणिज्य संघ, नागरिक समाज, स्थानीय राजनीतिक दलका प्रतिनिधि तथा स्थानीय नागरिकको उपस्थिति रहेको थियो ।