खोज

बुटवल, ८ फागुन ।

लुम्विनी प्रदेशका स्वास्थ्य मन्त्री बिष्णु पन्थीले सडक दुर्घटनाबाट हुने अकाल मृत्युबाट नागरिकलाई बचाउन सबैको चासो र सहकार्य आवश्यक रहेको बताएका छन् ।

“बढ्दो दुर्घटनाका कारण हाम्रो समाज अक्रान्त छ, दुर्घटनाले समाजका योग्य र कुशल नागरिक समेत गुमाउनु परेको छ यस्तो भयाबह अवस्था कम गर्न सबैको सहकार्य जरुरी छ”– पन्थीले भने ।

भौतिक पुर्वाधार तथा यातायात मन्त्रालय अन्तर्गतको “नेशनल रोड सेफटी काउन्सिल नेपाल” को आयोजना, नासा नेपाल र सुरक्षित यात्रा अभियान नेपालको संयोजन तथा नेशनल एलायन्स फर सेफ एण्ड सस्टेनेबल मोबिलिटी नेपालको सहकार्यमा बुटवलमा आयोजित सडक सुरक्षा सम्बन्धी प्रदेश स्तरीय जनचेतनामुलक कार्यक्रम बोल्दै मन्त्री पन्थीले उक्त कुरा बताएका हुन् ।

कार्यक्रममा बोल्दै लुम्विनी प्रदेशका उद्योग बन बातावरण पर्यटन तथा यातायात मन्त्री जानकी प्रसाद यादवले दुर्घटना न्युनिकरणका लागि नागरीक सचेतना जगाउन लुम्विनी प्रदेश सरकारले आवश्यक कदम चाल्ने बताए ।

मन्त्री यादवले सडक दुर्घटनाबाट हुने क्षति अकल्पनीय ढंगको हुने बताउँदै यसको न्युनिकरणका लागि बिद्यालय स्तरबाटै पाठ्यक्रम आवश्यक रहेकोले मन्त्रालयले सो अनुसारको नीतिगत प्रक्रिया अगाडि बढाउने प्रतिवद्धता जनाए ।

कार्यक्रममा बोल्दै रुपन्देहीका प्रमुख जिल्ला अधिकारी भरतमणी पाण्डेले नागरिक सचेत नभए सम्म सडक र सवारीमा हुने अब्यवस्था हटाउन कठिन हुने बताउँदै नागरिकलाई दुर्घटनाका बिषयमा सचेत बनाउनु पहिलो आबश्यकता भएको बताए ।

लुम्विनी प्रदेशसभा सदस्य तुलसी प्रसाद चौधरीको अध्यक्षतामा सम्पन्न कार्यक्रममा नासा पाउण्डेशनका महासचिव गोविन्द भट्टराईले सडक दुर्घटनाको अवस्था र मानवीय क्षतीको नियन्त्रण, अभियान्ता कमला आचार्यले सडक दुर्घटना न्युनिकरणमा सामाजिक संघ संस्थाहरुको भूमिका, नेपाल प्रहरी राजमार्ग सुरक्षा तथा ट्राफिक ब्यवस्थापन कार्यालयका प्रमुख प्रहरी उपरीक्षक कृष्ण प्रसाईले लुम्विनी प्रदेशको ट्राफिक ब्यवस्थापनका समस्या र अवस्था तथा सुरक्षित यात्रा अभियान नेपालका महासचिव दिनेश पाण्डेले दुर्घटना न्युनिकरणका लागि नागरिक स्तरबाट भएका कार्यहरु बारे प्रस्तुतिकरण गरेका थिए ।
लुम्विनी प्रदेशका पेशागत, व्यवसायिक तथा सामाजिक क्षेत्रका प्रतिनिधिहरुको सहभागिता रहेको सो कार्यक्रममा पूर्वाधार नीति, कार्यक्रम तथा सुरक्षित यातायातको दीर्घकालिन योजनाका लागि सुझावहरु प्रस्तुत भएका थिए ।

कार्यक्रमले प्रदेशसभा सदस्य तुलसी प्रसाद चौधरी संयोजक, पुर्व सभासद दिपा बिश्वकर्मा, नेपाल रेडक्रस सोसाईटीका दिपक क्षेत्री न्यौपाने, यातायात ब्यवसायी नारायण प्रसाद घिमिरे, दिनेश फुल्लेल, ई.नवसुजित भण्डारी, अधिकारकर्मी रिमा बिसी लगायत रहेको प्रोभिन्स रोडसेफ्टी एलायन्सको सचिवालय गठन गरेको छ ।

कार्यक्रमले नेपाल सरकारले प्रतिवद्धता व्यक्त गरेको सन् २०३० सम्ममा सडक दुर्घटना र यसबाट हुने हताहती तथा घाइतेको संख्या आधा घटाउने लक्ष्यलाई, प्रदेशको सरकार, पालिका तथा नागरिक समुदायबाट साथ सहयोग तथा समर्थन व्यक्त गर्दै बिभिन्न १७ बुंदे बुटवल घोषणा पत्र समेत जारी गरेको छ ।