खोज

दाङ, ८ फागुन ।

दाङका सडक निर्माण कार्यको जिम्मेवारी लिएर लामो समय निर्माण कार्य नसकेर लथालिङ्ग पार्दा नागरिकले अनाहकमा दुःख पाएको भन्दै निर्माण कार्य चाँडो सम्पन्न गर्न दवाब दिन स्थानीयले सडक डिभिजन कार्यालय दाङको मूल गेटमा तालाबन्दी गरेका छन् । कटुवाखोला तुलसीपुरको चोक सडक पटक पटक म्याद भएर पनि काम नगर्ने ठेक्दारलाई म्याद गुज्रिएको लामो समय भई सक्दा पनि कारवाही नगर्ने, काम पनि नगर्ने अवस्थाको अन्त्य गर्दै अबिलम्ब सडक निर्माण र मर्मत कार्य अघि बढाउन दवाब दिईएको छ ।

२०७० सालदेखि निर्माण थालनी गरेर अहिलेसम्म पनि सडक निर्माणको काम सम्पन्न नगरी ठेकेदार कम्पनी बेपत्ता हुँदा पनि सडक डिभिजन कार्यालयले चासो नलिएर नागरिकलाई दुःख दिएको भन्दै दवाव स्वरुप सोमबार कार्यालय समयमा सडक डिभिजन कार्यालय पुगेर मुल गेटमा तालाबन्दी गरेर कार्यालय प्रमुखसहित कर्मचारीलाई कार्यालय प्रवेशमा रोक लगाएका हुन् ।

घोराहीस्थित सिद्धार्थ गौतमनगर टोल विकास संस्था, बयलडाँडा चौतारी क्लवको नेतृत्वमा गएको दवाब समूहले दाङ जिल्ला उद्योग वाणिज्य संघ, नागरिक समाज, स्थानीय राजनीतिक दलका प्रतिनिधि तथा स्थानीय नागरिकको उपस्थितिमा ताला लगाइएको थियो ।

यसअघि पनि सडक कार्यालयमा प्रमुखलाई भेट गरी समस्याको बारेमा जानकारी गराएको तर कामले सार्थकता नपाएपछि बाध्य भएर सडकमा उत्रिनु परेको सिद्धार्थ गौतमनगर टोलका अध्यक्ष चित्रकान्त आचार्यले बताए । सडक निर्माण अलपत्र भएका कारण नागरिकले ज्यान गुमाउनेदेखि धुलोको मार खेप्नु परेको उनको भनाइ थियो ।

पटक पटक दवाबको सुनुवाइ नभए आगामी दिनमा कडा आन्दोलन गर्न बाध्य हुने उनको चेतावनी छ । घोराही–तुलसीपुर चारलेन सडक निर्माणको नाममा भएको ढिलासुस्तीका कारण २५ बढीको ज्यान गएको, कैयौं घाइते भएको तथा परिवारमा बिचल्ली भएको अवस्थामा पनि राज्य मौन बसेको हुँदा अब नागरिक अब चुप लागेर नबस्ने नागरिक समाज दाङका संयोजक केबी मसालको भनाई छ । राज्य जनताप्रति उत्तरदायी नहुँदा बाध्य भएर ताला लगाउन परेको उनको भनाइ छ ।

अस्तव्यस्त लथालिङ्ग फोरलेन सडकसहित निर्माणाधीन सडकहरु समयमै निर्माण गर्न दवाव स्वरूप धर्ना कार्यक्रममा दाङ जिल्ला उद्योग वाणिज्य संघका अध्यक्ष टंकसिंह बुढाथोकी, स्थानीय टोलका अध्यक्ष शिवशंकर देवकोटालगायतले अब जनतालाई यो वा त्यो बहाना देखाएर अल्मलाउन नमिल्ने भन्दै जनताको करबाट बन्ने हरेक काम समयमै सम्पन्न गर्न चेतावनी दिए । घोराहीको कटुवाखोलादेखि तुलसीपुर चोकसम्मको सडक अहिलेसम्म निर्माण सम्पन्न नहुँदा ट्राफिक चोक सधैँको घुलाम्य हुँदा स्थानीयलाई बस्ने, व्यवसाय गर्ने वातावरण नभएकाले नागरिकको स्वास्थ्यमा खेलवाड नगर्न पनि सचेत गराईएको छ । विरोध सभापछि १० बजे मुलगेटमा तालाबन्दी गर्ने समयमा प्रहरीले अवरोध गर्न खोजेपछि विरोधकर्ताले नाराबाजी गरेका थिए । दवावमुलक कार्यक्रमको सहजीकरण बयलडाँडा चौतारी क्लवका अध्यक्ष नारायणप्रसाद भुसालले गरेका थिए ।