खोज

दाङ, २ फागुन ।

लुम्बिनी प्रदेशका मुख्यमन्त्री लिला गिरीले शहीदको बलिदानीबाट अहिलेको व्यवस्था स्थापित सम्भव भएको बताएका छन् । मगर संघका दाङ जिल्लाले आयोजना गरेको नेपालका प्रथम शहीद लखन थापाको १४६ औं स्मृति दिवस तथा पूर्णकदको शालिक अनावरण कार्यक्रममा लुम्बिनी प्रदेशका मुख्यमन्त्री गिरीले यस्तो धारणा राखेका हुन् । उनले शहीदले देश र जनताको उत्थानका लागि निश्वार्थ ज्यानको बलिदानी दिएका कारण अहिले मुलुकमा संघीय लोकतान्त्रिक गणतन्त्र स्थापना सम्भव भएको बताए ।

तत्कालीन समयमा पनि मुलुकको राजनीतिक, सामाजिक परिवर्तनका लागि अन्याय अत्याचारका विरुद्ध स्वार्थभन्दा माथि उठेर बलिदानी दिएका लखन थापाले गरेको साहस नै अहिलेको व्यवस्था परिवर्तनको प्रेरणाको श्रोत भएको उनले जिकिर गरे ।

मुख्यमन्त्री गिरीले लखन थापाले नेपाल र नेपाली जनताको न्याय र स्वतन्त्रताको लागि युगौ युगसम्म सम्झन लायक काम गरेको हुँदा राज्यले सम्मान गरेको बताए । उनले लखन थापाको बलिदानीको प्रेरणाबाट पाठ सिक्दै जहानिया राणाशासन, पञ्चायती व्यवस्था, राजतन्त्र जस्ता व्यवस्था फाल्दै जनताको शासन चल्ने संघीय लोकतान्त्रिक गणतन्त्रसहितको व्यवस्था स्थापना गर्न सकिएको बताए ।

कार्यक्रममा लुम्बिनी प्रदेश सभा सदस्य राजु खनालले शहीदहरुको सपना पूरा गर्न सबैको ध्यान जान आवश्यक रहेको बताए । मुलुकको विकासका लागि जीउज्यानको बाजी लगाउने शहीदहरुकै कारण अहिलेको व्यवस्था स्थापना भएको बताउँदै उनले शहीदलाई राज्यले साझा सम्पत्तिका रुपमा ग्रहण गर्न सक्नुपर्ने बताए ।

कार्यक्रममा घोराही उपमहानगरपालिकाका नगर प्रमुख नरुलाल चौधरीले देशको रक्षा गर्न अत्याचारका विरुद्ध लड्नुर्छ, सहनु हुँदैन भन्ने सन्देश दिने लखन थापाबाट अहिलेको समाजले शिक्षा लिन आवश्यक रहेको बताए । उनले देखाएको बाटो र योगदानले मुलुकले संघीय लोकतान्त्रिक गणतन्त्र पाएको हुँदा देश र जनताको समृद्धिका लागि तीनवटै सरकारले जिम्मेवारीपूर्वक काम गरिरहेको बताए । लखनपार्कले शहिदको सम्मान मात्रै होईन, घोराही बजारको सौन्दर्यता कायम गर्न मद्दत गरेको उनले बताए । स्थानीय तहले आफ्नो क्षमताको आधारमा सहयोग गर्ने गरेको जानकारी उनले गराए ।

२०७४ मा पहिलो पटक निर्वाचित भएर आएपछि तत्कालीन त्रिभुवन पार्कलाई लखन पार्क बनाउने संस्थागत निर्णय गरी यसको विकासका लागि माथिल्लो तहमा पहल गरेको पनि उनले बताए ।

सोही अवसरमा पार्क निर्माण समिति संयोजक खलु पुन मगरले लखन पार्कमा पूर्ण कदको शालिक निर्माण तथा सजावटका लागि लुम्बिनी प्रदेश सरकारको पर्यटन कार्यालयबाट १५ लाख, घोराही उपमहानगरबाट २ लाख, क्यारी निर्माणका लागि वडा नम्बर १४ बाट १ लाख ५० हजार तथा दर्जनौं सहयोगी र दाताहरुबाट संकलन भएको रकमले काम गरिएको जानकारी गराए ।

लामो समयसम्म राज्यका तर्फबाट सम्बोधन हुन नसकेका बेला २०५६ फागुन ११ गते नेपाल सरकारबाट शहीद घोषणा गरिएकोमा पछि २०७२ असोज ३ गते नेपाल सरकारबाट नेपालको प्रथम शहीद घोषणा गरिएको थियो । २०७३ बाट नेपाल सरकारले हुलाक टिकट प्रकाशन भएको छ ।