खोज

काठमाडौँ ।

नेकपा माओवादी केन्द्रले पुरानै कार्यविभाजनलाई ब्युँताएको छ । आठौँ महाधिवेशनपछि पदाधिकारी चयनबाहेक नेताहरुको कार्यविजन गर्न नसकेको माओवादीले महाधिवेशन अघिकै कार्यविभाजनलाई ब्युँताउने निर्णय गरेको स्रोतले बतायो । माओवादी केन्द्रका नेता गणेश साहले पार्टीले पुरानै कार्यविभाजनलाई ब्युँताएको पुष्टि गरे । तर, सह–ईञ्चार्जको व्यवस्था हाललाई नराख्ने निर्णय भएको उनको भनाइ छ । अर्का एक नेताले प्रदेश समन्वय समितिको बैठक राखी सबै केन्द्रीय सदस्य र प्रदेश सदस्य सहित सबै नेताहरुको जिम्मेवारी तोक्दा एकपद एक कार्यकारी जिम्मेवारीमा जोड दिने हालै सम्पन्न स्थायी कमिटी बैठकले तय गरेको पनि बताए ।

यस्तै केन्द्रीय सदस्यहरुलाई संघको निर्वाचन क्षेत्र, प्रदेश निर्वाचन क्षेत्र, महानगरपालिका र उप–महानगरपालिकामा कार्यरत रहने गरी जिम्मेवारी ठोस गर्ने पनि तय भएको छ । यसबाहेक प्रदेश समन्वय समितिको निर्णय केन्द्रीय समितिकै अंग हुनेगरी पार्टीले व्यवस्था पनि गरेको छ ।

माआवादी कार्यविभाजनअनुसार पदाधिकारी २२ सदस्यीय बनाएको छ । नेता अग्ति सापकोटालाई उपाध्यक्षमा मनोनीत गरिएसँगै २२ सदस्यीय बनेको हो । यस्तै उपमहासचिव पम्फा भुसाललाई उपाध्यक्षमा बढुवा गरिएको छ ।

महाधिवेशनअघि माओवादी अर्थ विभागको प्रमुखमा वर्षमान पुन रहेका थिए भने कृषि तथा भूमिसुधार विभागमा हरिबोल गजुरेल, उद्योग तथा बाणिज्य विभागमा वामदेव क्षेत्री, कृषि तथा आर्थिक व्यवस्थापन विभागमा डोरप्रसाद उपाध्याय, उपभोक्ता हित तथा आपूर्ति विभागमा मातृका यादव, खानेपानी तथा सरसफाइ विभागमा बिना मगर, प्रवक्तामा कृष्ण बहादुर महरा, संगठन विभागमा जनार्दन शर्मा प्रमुख रहेका थिए ।

यस्तै यसैगरी स्कुल विभागमा प्रचण्ड तथा प्रमुखमा गिरिराजमणि पोखरेल थिए । यस्तै नारायणकाजी श्रेष्ठ प्रवास समिति इन्चार्ज थिए ।  यस्तै माओवादीले त्यतिबेला प्रदेश, प्रवास, जिल्ला समन्वय , उपत्यका समन्वय, सम्पर्क जस्ता समिति गठन गरेर नेताहरुको जिम्मेवारी तोकेको थियो ।