खोज

बुटवल, २२ माघ ।

तेस्रो डिष्ट्रिक लेभल रोटरी ब्याडमिन्टन २०२२–२३ प्रतियोगिताको उपाधि खुलातर्फ रोटरी क्लब अफ धादिङका रामचन्द्र गिरी र राम मल्ल थापाको जोडीले उपाधि जितेका छन् । शनिबार भएको फाईनल खेलमा रोटरी क्लब अफ बुटवलका वसन्त थापा घर्ती र लिलबहादुर थापाको जोडीलाई सोझो सेटमा पराजित गर्दै उपाधि चुमेका हुन् ।

उपाधि विजेता जोडीले नगद २० हजार, कप, मेडल, प्रमाणपत्रबाट पुरस्कृत भएका छन् भने उपविजेता घर्ती र थापाको जोडी नगद १५ हजार, कप, मेडल, प्रमाणपत्रमा चित्त बुझाएका छन । यसैगरी रोटरी क्लब अफ बुटवल डाउनटाउनका नारायण तिवारी र दिलिप गौचन तथा रोटरी क्लब अफ बुटवलका लालमणि पन्थी र अशोक प्रधानको जोडी तेस्रो हुदै नगद १० हजार, कप, मेडल, प्रमाणपत्रबाट पुरस्कृत भएका छन् ।

यसैगरी भेट्रान्सतर्फ रोटरी क्लब अफ बुटवलका वसन्त थापा घर्ती र रोहित पुरीको जोडीले उपाधि जितेका छन् । फाईनलमा रोटरी क्लब अफ सेन्टर बुटवलका सुदिप खनाल र धर्मा थापाको जोडीलाई २–१ को सेटमा पराजित गर्दै घर्ती र पुरीको जोडीले उपाधि चुमेको हो । उपाधिसंगै विजेता जोडी नगद १५ हजार, कप, मेडल, प्रमाणपत्रबाट पुरस्कृत भएका छन् ।

उपविजेता खनाल र थापाको जोडीले नगद १० हजार, कप, मेडल, प्रमाणपत्रमा चित्त बुझाएका छन् । प्रतियोगितामा रोटरी क्लब अफ बुटवल डाउनटाउनका भरत राना र दीप आचार्यको जोडी तथा रोटरी क्लब अफ बुटवलका बोनिन पिया र जीवकान्त काफलेको जोडी तेस्रो हँुदै नगद ६ हजारसहित कप, मेडल, प्रमाणपत्रबाट पुरस्कृत भएका छन् ।

रोटरी क्लब अफ बुटवल र रोटरी क्लब अफ बुटवल डाउनटाउनको संयुक्त आयोजनामा तिलोत्तमा ब्याडमिन्टन क्लबमा भएको प्रतियोगिताका बिजेता, उपविजेता टिम तथा उत्कृष्ट खेलाडीहरुलाई एक समारोहका बीच तिलोत्तमा नगरपालिकाका नगरप्रमुख रामकृष्ण खाँणले पुरस्कार वितरण गर्दै खेल र खेलाडीको विकासमा स्थानीय पालिका सधै लाग्ने बताए ।

रोटरी क्लब अफ बुटवल अध्यक्ष बोनिन पियाले रोटरी ईन्टरनेशनल ३२९२ नेपाल भुटान अन्तर्गतका क्लबका सदस्य बीचमा खेल प्रतियोगितामार्फत भातृत्व विकास गर्ने उद्देश्यका साथ कार्यक्रम गरिएको बताए । रोटरी ईन्टरनेशनल ३२९२ नेपाल भुटान अन्तर्गतका क्लबहरुका सदस्यहरु प्रतियोगितामा सहभागिता हुन पाउने उनले बताए । क्लब आफना सदस्यहरु बीचमा खेलमार्फत भाईचारा विकास गर्ने रुपमा प्रतियोगितालाई लिएको उनले बताए । विश्वमा नै ‘स्वार्थभन्दा माथि सेवा’ भन्ने मूल नारा आत्मसात गर्दै रोटरी क्लबले शिक्षा, स्वस्थ्य, खानेपानी, सरसफाई, मातृशिशु र वातावरण जस्ता मानव जीवनका आधारभुत क्षेत्रमा सामाजिक र मानवीय कार्यमार्फत अभियान चलाउँदै आएको रोटरी क्लब अफ डाउनटाउनका अध्यक्ष भरत रानाले बताए। कार्यक्रमका संयोजक टिकाराम पन्थी र रोहित पुरी तेस्रो संस्करणमा आयोजना गरिएको कार्यक्रम भब्य रुपमा सफल भएको बताए ।