खोज

बुटवल। २१ माघ ।

सिद्धबाबा मन्दिर विकास समिति तिनाउ ३ पाल्पामा नयाँ नेतृत्व चयन भएको छ । समितिले शनिबार आयोजना गरेको सिद्धबाबा मन्दिर विकास समिति तिनाउ पाल्पाको बार्षिक साधारण सभा तथा समिति पुनर्गठन कार्यक्रमबाट सन्तोष कुमार शेरचनको अध्यक्षतामा १५ सदस्यीय समिति गठन गरेको हो ।

जसको उपाध्यक्षमा अमर प्रधान, सचिवमा अरविन्द पाण्डे, सहसचिवमा दुर्गा थापा, कोषाध्यक्षमा कुमारी खड्का, सदस्यहरुमा लक्ष्मी प्रसाद बस्याल, तोया लम्साल, जगबहादुर क्षेत्री, दुर्गा थापा, रिमीसरा दर्लामी, कृष्ण पाण्डे, पदम गाहा, गोपाल बस्याल रहेका छन् ।

त्यस्तै पदेन सदस्यमा वडा नम्बर ३ का अध्यक्ष चित्रबहादुर थापा, मन्दिरका मूल पुरोहित नारायण घिमिरे रहेका छन् । पहिलो कार्यसमिति बैठकले थप दुईजना सदस्य थप गरिने नवनिर्वाचित अध्यक्ष शेरचनले जानकारी दिए ।

यसअघि कार्यक्रममा बोल्दै तिनाउ गाउँपालिकाका अध्यक्ष प्रेम श्रेष्ठले सिद्धबाबा मन्दिर सबैको साझा सम्पत्ति भएको बताए । श्रेष्ठले मन्दिरको सबैमिलेर संरक्षण गर्नुपर्ने बताए । पछिल्लो समय मन्दिरको प्रचारप्रसार भएकाले भक्तजनको संख्यामा बृद्धि भएको उनले बताए । पालिकाको तर्फबाट सधै मन्दिरको संरक्षणमा लाग्ने प्रतिबद्धता ब्यक्त गरे ।

तिनाउ गाउँपालिकाका उपाध्यक्ष लालबहादुर थापाले मन्दिरको विकासका लागि मन्दिरमा आउने ब्यक्तिहरुलाई यहाँ बास बसाल्ने गरी कार्ययोजना गराउन अनुरोध गरे । तिनाउ गाउँपालिकाका प्रवक्ता यादव प्रसाद अर्यालले २०५४ सालदेखि सिद्धबाबा मन्दिरसंग नजिक रहेको बताउँदै विभिन्न समस्या आउँछन् त्यस्ता समस्याहरु समाधान गर्दै अगाडि बढनु पर्नेमा जोड दिए ।

समितिका पुर्व अध्यक्ष महेन्द्र पाण्डेले सिद्धबाबाको महिमा बढाउन गरेको प्रयास सार्थक भएको बताए । कार्यक्रममा सिद्धबाबाको महिमा र गरिमा समेटिएको धार्मिक पर्यटकीय गन्तब्य सिद्ध्पुरुष भतृहरि तथा आदिमानव रामपिथेकस विशेषाङ्क पुस्तक सिद्धबाबा २०७९ विमोचन गरिएको छ ।

पुस्तकको तिनाउ गाउँपालिकाका अध्यक्ष प्रेम श्रेष्ठले विमोचन गरेका थिए । पुस्तकमा विभिन्न क्षेत्रका जानकार लेखकहरुले सिद्धबाबाको महिमा ऐतिहासिक महत्व आगामी योजना यो भन्दा अगाडि गरेका कार्यहरुका बोरमा लेखहरु समेटिएको छ ।

कार्यक्रममा आफ्नो कार्यकालमा गरेका कार्यहरु समेटिएको अध्यक्षको प्रतिवेदन अध्यक्ष दलबहादुर गुरुङले र आय ब्यय समेटिएको कोषाध्यक्षको प्रतिवेदन कोषाध्यक्ष दुर्गा बहादुर थापाले प्रस्तुत गरेका थिए ।

कार्यक्रममा बोल्दै प्राध्यापक हुमाकान्त पाण्डेले यसको महिमा बढाउन सबैको उत्तिकै भूमिका रहने बताए । कार्यक्रममा नेकपा एमालेका तिनाउ गाउँपालिकाका प्रतिनिधि राम बहादुर थापा, माओवादी केन्द्रका तिनाउ गाउँपालिका प्रतिनिधि राजेश श्रेष्ठ, नेपाली कांग्रेस तिनाउ पालिकाका सभापति प्रेम पाण्डे लागायतले शुभकामना व्यक्त गरेका थिए ।

कार्यक्रममा पुस ९ गते रेडियो मुक्ति बुटवलले आयोजना गरको फुटसल कार्यक्रममा दोस्रो हुन सफल तिनाउका महिला समुहलाईसल ओडाएर सम्मान गरिएको थियो । कार्यक्रम अध्यक्ष दलबहादुर गुरुङको अध्यक्षतामा भएको थियो भने उपाध्यक्ष सन्तोषकुमार शरेचन, सचिव अमर प्रधानलगायतले पनि बोलेका थिए ।

सिद्धबाबा पत्रकारिता पुरस्कार २०७९ बाट पत्रकार पाण्डे सम्मानित
सिद्धबाबा पत्रकारिता पुरस्कार २०७९ बाट रेडियो मुक्ति बुटवलका समाचार प्रमुख अस्मिना पाण्डे सम्मानित भएकी छन् । समितिले शनिबार आयोजना गरेको सिद्धबाबा मन्दिर विकास समिति तिनाउ पाल्पाको बार्षिक साधारण सभा तथा समिति पुनर्गठन कार्यक्रमको अवसर पारेर पाण्डेलाई तिनाउ गाउँपालिकाका अध्यक्ष प्रेम श्रेष्ठ, उपाध्यक्ष लालबहादरु थापा र समितिका अध्यक्ष दलबहादुर गुरुङ्गले नगद सहित दोसल्ला ओढाएर सम्मान गरेका थिए ।

पाण्डेले मन्दिरको प्रचार प्रसारमा पुर्याएको योगदानको कदर गर्दै सम्मान गरिएको अध्यक्ष गुरुङ्गले बताए । पाण्डे रुपन्देहीमा रहेको रेडियो मुक्ति र लुम्बिनी सामुदायिक टेलिभिजनमा आवद्ध रहेर पत्रकारिता गर्दै आएकी छन् ।

पाण्डेले पछिल्लो समय सिद्धबाबाको प्रचार प्रसारमा टेवा पुर्याउने उद्देश्यले प्रत्येक साताको शनिबार बिहान साढे ६ बजेदेखि सात बजेसम्म रेडियो मुक्तिबाट प्रसारण हुँदै आएको कार्यक्रम सिद्धसन्देश उत्पादन गर्दे आइरहेकी छन् ।