खोज

बुटवल, १४ माघ ।

बुटवल, पब्लिकेशन प्रालिद्वारा प्रकाशित बुटवल टुडे राष्ट्रिय दैनिकको ११ औ बार्षिकोत्सवको अवसरमा संवाददाता, लेखकहरुका बीचमा कार्यशाला गोष्ठी गरिएको छ । शनिबार मणिग्राममा आयोजना गरिएको कार्याशाला गोष्ठीमा बोल्दै अग्रज पत्रकार मदनलाल पौडेलले बुटवल टुडेले पत्रकारितामा अलग पहिचान स्थापित गरेको बताए । उनले बुटवल टुडेले उठान गरेको विषयवस्तु, लेख तथा खोजमूलक सामग्री अन्य भन्दा पृथक भएको भन्दै आगामी दिनमा पनि यसलाई निरन्तरता दिनुपर्ने बताएका थिए । अग्रज पत्रकार पौडेलले पत्रकारहरु पार्टी पत्रकारिता भन्दा माथि उठ्नुपर्ने र खोजमूलक सामग्रीमा विशेष जोड दिनुपर्ने भन्दै त्यसो हुन सकेमात्रै पत्रकारिताले फड्को मार्ने बताए ।

बुटवल पब्लिेकशन प्रालिका अध्यक्ष हरि प्रसाद पौडेलले बुटवल टुडेको इतिहास लामो नभएपनि यसले छोटो समयमा नै देशकै अग्रणी सञ्चार माध्यम बन्न सफल भएको बताएका थिए । उनले न्यू मिडियाको रुपमा न्यूज बुटवल टुडे डट कम सुरुवात गरेको भन्दै यसलाई प्रदेश एक नम्बर र देशकै अब्बल सञ्चार माध्यमको रुपमा उभ्याउने बताएका थिए ।

प्रबन्ध सञ्चालक तथा प्रबन्ध सम्पादक नवराज कुँवरले अनलाईन संस्करणले आगामी दिनमा अन्य सञ्चार माध्यम भन्दा पृथक शैली र सोँचका अनुसार काम गर्ने बताएका थिए । उनले स्थापनाको छोटो समयमा नै न्यूज बुटवल टुडे अनलाइनले राम्रो छाप छोड्न सफल भएको भन्दै आगामी दिनमा अझ बढी सशक्त सञ्चार माध्यमको रुपमा अगाडि बढ्ने बताएका थिए ।

कार्यशाला गोष्ठीमा बुटवल टुडे दैनिकका सम्पादक कृष्ण मल्लले इतिहासको कालखण्डमा बुटवल टुडेले समाचारमा कहिल्यै पनि सम्झौता नगरेको भन्दै आगामी दिनमा पनि आफ्नो इतिहास कायम राख्ने बताएका थिए ।

कार्यशालामा न्यूज बुटवल टुडेका सह सम्पादक लक्ष्मण पौडेलले अनलाईनले प्रकाशन गर्ने विषय बस्तुको बारेमा कार्यपत्र प्रस्तुत गरेका थिए । बुटवल टुडे दैनिकका उप सम्पादक कृष्ण खनालले पत्रिकाको शैली समाचारको विषयवस्तुको विषयमा कार्य पत्र प्रस्तुत गरेका थिए भने कार्यशालामा लेखक, स्तम्भकार छलफलमा पत्रिकाका सम्पादक कृष्ण मल्ल, सल्लाहकार सम्पादक छवि पाण्डेले सहजीकरण गर्दै पत्रिकाले प्रकाशन गर्ने लेख, रचना, विषयवस्तु माथिको पृथकता, शैली र विषय बस्तु उठानको विषयमा प्रकाश पारेका थिए । कार्यशालामा न्युज बुटवल टुडेका उपसम्पादक टिआर शर्माले छिटो सूचना प्रदान गर्न सकेमात्रै अनलाईनले अन्य न्यू मिडियासँग प्रतिष्पर्धा गर्न सक्ने भएकाले यसतर्फ संवाददाताहरुले विशेष ध्यान दिनुपर्नेमा जोड दिएका थिए । त्यस्तै कपिलवस्तु संवाददाता खगप्रसाद चापागाईंले संवाददाताहरुका सवल र सुधार गर्नुपर्ने कुराहरुबारे डेस्कले बेलाबेलामा औंल्याउनुपर्नेमा जोड दिएका थिए । कार्यशालामा विभिन्न जिल्ला संवाददाता, कार्यालयका कर्मचारीलगायतको सहभागिता रहेको थियो ।