खोज

सल्यान, १३ माघ ।

भाडाको भवनबाट सञ्चालन भइरहेको बागचौर नगरपालिका, नगर कार्यपालिकाको कार्यालय शुक्रबार आफ्नै भवनमा सरेको छ । नगरपालिकाको प्रशासकीय भवनको मौलिक कला संस्कृती झल्कने प्रस्तुती सहितको कार्यक्रमका बीच नगरप्रमुख जनकराज गौतमले उदघाटन गरेका हुन् । कार्यालय सार्ने प्रयोजनका लागि नगर कार्यपालिकाको कार्यालयबाट प्रवाह हुने अत्यावश्यक वाहेकका सेवा तीन दिनलाई स्थगित समेत गरिएको थियो ।

प्रशासकीय भवन निर्माण भएको झण्डै चार वर्षपछि कार्यालय सारिएको हो । अख्तियारमा मुद्दा लगायतका कारणले नयाँ भवनमा कार्यालय सारिएको थिएन । नगरपालिकाको आफ्नै भवन निर्माणका लागि स्थानीय ३३ जनाले जग्गा दान गरेका थिए भने २३ जनाले नगद रकम सहयोग समेत गरेका थिए । यो भवन भ्याट वाहेक तीन करोड २९ लाखमा निर्माण भएको नगरपालिकाले जनाएको छ । आफ्नै भवनको अभावमा भाडामा कार्यालय सञ्चालन गर्नुपर्दा व्ययभार पनि बढी हुने र सेवा प्रवाहमा पनि समस्या हुनेगरेकोमा अवदेखी यसप्रकारको समस्या समाधान हुने नगरप्रमुख गौतमको अपेक्षा छ । आफ्नै प्रशासकीय भवन र विषयगत शाखाहरू एउटै भवनबाट सञ्चालन हुने भएपछि सेवा प्रदायक र सेवाग्राही सबैलाई सहज हुने उनले बताए । भवन उद्घाटन गर्दै नगरप्रमुख गौतमले नगरवासीको हितलाई ध्यानमा राखेर आफु काममा लागि पर्ने र सबैलाई अनुभूती हुनेगरी काम गरेर देखाउने प्रतिवद्धता जनाए ।

यस्तै उपप्रमुख सुम्निमा डिसी वलीले आफ्नै भवनबाट एकीकृत सेवा प्रवाह हुने र विकास निर्माणको कामलाई अझ चुस्त सरल सहज र प्रभावकारी बनाउन सहयोग पुग्ने विश्वास व्यक्त गरिन् । उनले नगरको कामका लागि धेरै समय कुर्नुपर्ने समस्याको अन्य हुने बताइन् । सो अवसरमा भवन निर्माणको लागि जग्गा दान गर्ने तथा आर्थिक सयोग गर्ने स्थानीयहरुलाई सम्मान गरिएको थियो । कार्यक्रममा बागचौर नगरपालिकाका पहिलो नगरप्रमुख लोकमान बुढाथोकी, प्रमुख प्रासकीय अधिकृत अनन्त कुमार गौतम, वडाध्यक्षहरु सहित जनप्रतिनिधीहरु, कर्मचारी, विभिन्न राजनितिक दलका प्रतिनिधिहरु, पत्रकार, स्थानीयहरुको सहभागिता रहेको थियो ।