खोज

बुटवल, २९ पुस ।

शिक्षा क्षेत्रको विकासमा निजी क्षेत्रले गरेको योगदानको सरकारबाट उचित मुल्याकन नभएको एक कार्यक्रममा बोल्ने वक्ताहरुले गुनासो गरेका छन । देशमा दक्ष जनशक्ति उत्पादन गरी शैक्षिक विकासमा योगदान दिदै आएको निजी तथा आवासीय विद्यालय अर्गनाइजेसन नेपाल (प्याब्सन) को लुम्बिनी प्रदेश परिषद भेलामा बोल्ने वक्ताहरुले शैक्षिक क्षेत्र पनि आर्थिक संकटबाट अछुतो नरहेको भन्दै यसतर्फ सरकारको ध्यान जानुपर्ने बताए ।

शुक्रबार बुटवलमा सुरु भएको दुई दिने भेलाको प्याब्सनका केन्द्रीय अध्यक्ष डिके ढुगानाले उदघाटन गर्दै सरकारले निजी क्षेत्रको शैक्षिक योगदानप्रति दृष्टिकोण परिर्वतन गर्नुपर्ने बताए । केवल मुनाफामात्र नभई सामाजिक दायित्वमा समेत आफुहरु अग्रसर रहेको दाबी गर्दै दक्ष जनशक्ति उत्पादनमा गरेको योगदानको उचित मुल्याकन हुन नसकेको दुखेसो गरे ।

कार्यक्रममा प्याब्सनका केन्द्रीय उपाध्यक्ष तथा लुम्बिनी प्रदेश ईन्चार्ज विष्णु पन्थीले वर्तमान देशको आर्थिक, सामाजिक अवस्था र प्याब्सनको योगदानबारे छलफलका लागि भेला आयोजना गरिएको बताए । प्रदेश परिषदमा प्याब्सन सागठनिक तथा आर्थिक विवेचना, सरकारबाट सृजना भएका ऐन, ४५ प्रतिशत छात्रवृत्ति दिने, राष्ट्रिय अर्थतन्त्रमा आएको प्रभावले शिक्षा क्षेत्रमा आएको समस्या समाधानको विषयमा समेत छलफल गरेर निचोड निकालिने उनले बताए ।

कार्यक्रममा प्रदेश अध्यक्ष लालहरि पाण्डेले नेपालको शैक्षिक विकासमा प्याब्सनको योगदानबारे चर्चा गर्दै संगठित भएर अधिकार प्राप्तिमा लाग्ने समय भएको बताए । कार्यक्रममा च्याम्बर अफ कमर्श लुम्बिनी प्रदेशका अध्यक्ष टंक प्रसाद पोखरेलले कोभिड र त्यसपछिको वर्तमान समयमा देशको आर्थिक अवस्थाबारे समग्र क्षेत्र चिन्तित रहेको बताए । यो विषयमा सबै क्षेत्रको आवाज एक गरी अघि बढ्न जरुरी रहेको उनले बताए । नेपाल राष्ट्र बैकमा आवश्यक दबाबमुलक कार्य गरिदा थोरै सम्बोधन भएपनि त्यो पुर्ण नभएको गुनासो गरे । ‘थप अगाडि बढ्नुपर्ने समय आएको छ’– उनले बताए । जनशक्ति उत्पादन गर्दा विदेश पलाउनको अवस्था रोक्ने गरि अगाडि बढ्न जरुरी रहेको उनले बताए । शिक्षा पद्धतिलाई मौलिक, ब्यवहारिक रुपमा कार्यान्वयन हुनेगरि अघि बढ्न जरुरी रहेको उनले बताए ।

कार्यक्रममा नेपाल पत्रकार महासंघ रुपन्देही शाखाका अध्यक्ष रामराज पोखरेलले मिडिया सधै निजि क्षेत्रको पक्षमा रहेको भएपनि आवश्यक सहकार्य हुन नसकेको बताए । मिडियाको क्षेत्रबाट बिना स्वार्थ निजि विद्यालयसंग सहकार्य गर्न तयार रहेको उनले बताए । निजी क्षेत्रको सहकार्यबिना सरकारले ल्याउने नीति कार्यक्रम चल्न नसक्ने भन्दै उनले सरकार र निजि क्षेत्रको सहकार्य परिहार्य हुने बताए । नेपाल जस्तो देशमा सरकारले निजी क्षेत्र भेलामा १२ जिल्लाका पदाधिकारी, सदस्यहरुको सहभागिता रहेको थियो । प्याब्सन पाल्पा जिल्ला अध्यक्षमा रहेर शैक्षिक क्षेत्रका योगदान पुरयाएका लुम्बिनी प्रदेश सभा सदस्य खेम बहादुर सारुलाई दोसल्ला र प्रमाणपत्रबाट सम्मान गरिएको थियो ।