खोज

बुटवल,  पुस – तिलोत्तमामा जारी तिलोत्तमा मेयर कप क्रिकेट प्रतियोगिता २०७९ अन्तरगत सोमबार क्वाटरफाईनलमा विजयी हुदै वडा ४ र वडा १ विजयी हुदै अन्तिम चारमा स्थान पक्का गरेका छन । तिलोत्तमा नगरपालिकाको आयोजना तथा नवजिवन क्लबको सहआयोजनामा नवजिवन खेलमैदानमा भएको पहिलो खेलमा वडा नं ४ ले वडा नं ९ माथि ३ बिकेट तथा दोस्रो खेलमा वडा नं १ ले वडा नं ३ माथि ५१ रनको जित निकाल्दै अन्तिम चारमा स्थान बनाएको हो । मंगलबार पहिलो सेमिफाइनल खेलमा वडा २ र वडा ४ तथा दोस्रो सेमीफाईनल खेल वडा १ र वडा १७ भिड्ने संयोजक प्रकाश न्यौपानेले बताए ।

पहिलो खेलमा टस जितेर ब्याटिङको निर्णय गरेको वडा नं ९ ले पुरै २० ओभर खेल्दै ९ विकेटको नोक्सानीमा ९४ रनको लक्ष्य खडा गरेको थियो । उसका लागि निशान्त शर्माले शानदार अर्धसतक पुरा गरे पनि जित निकाल्न सकेनन । शर्माले ४३ बलमा ५२ रन बनाएका थिए । वडा नं ४ का सुलभ ढुगानाले ३ तथा पदम ज्ञवालीले २ विकेट लिएका थिए । झिनो लक्ष्य वडा नं ४ का ब्याट्सम्यानहरुले १६.५ ओभरमा ७ बिकेटको नोक्सानीमा भेटायो । वडा नं ४ को जितमा अजय थापाले २५ र ह्तिक थापाले २३ रनको योगदान दिए । वडा नं ९ का कमल अधिकारीले ३ तथा बिप्रसन केसीले २ बिकेट लिएका थिए ।

खेलमा वडा नं ४ का अजय थापा म्यान अफ दी म्याचबाट पुरस्कृत भए ।
यसैगरि दोस्रो खेलमा वडा नं १ ले टस जितेर १७.४ ओभरमा सबै बिकेट गुमाएर १ सय २३ रनको लक्ष्य खडा गरेको थियो । वडा नं १ का युवराज सेनले शानदार अर्धसतक पुरा गरे । उनले ३० बलमा ४ छक्का र ३ चौकाको मद्यतले ५४ रन बनाएका थिए । प्रकाश सारुले १५ बलमा १६ रनको योगदान दिए । वडा नं ३ का सागर गैरेले ३ तथा केशरसिह भण्डारीले २ बिकेट लिए । मध्यम लक्ष्य पछ्याएको वडा नं ३ का ब्याट्सम्यानहरु १६ ओभरमा केवल ७२ रनमा समेटिए । उसको लागि आशिष श्रेष्ठले २४ तथा केशरसिह भण्डारीले १६ बाहेक अन्य ब्याट्सम्यानले दोहोरो अंकको रन जोड्न सकेनन । वडा नं १ को जितमा बिशाल न्यौपानेले शानदार ४ तथा विपिन भट्टराईले २ विकेट लिएका थिए । खेलमा वडा नं १ का युवराज सेन म्यान अफ दी म्याचबाट पुरस्कृत भए ।