खोज

बुटवल, २६ पुस ।

तिलोत्तमामा जारी तिलोत्तमा मेयर कप क्रिकेट प्रतियोगिता २०७९ को उपाधिका लागि वडा नं. ४ र वडा नं. १ भिड्ने भएका छन । तिलोत्तमा नगरपालिकाको आयोजना तथा नवजिवन क्लबको सहआयोजनामा नवजिवन खेलमैदानमा मंगलबार भएको पहिलो सेमीफाईनल खेलमा वडा नं. ४ ले वडा नं. २ माथि ३५ रन तथा दोस्रो खेलमा वडा नं. १ ले वडा नं. १७ माथि १ विकेटको जित निकाल्दै फाईनल भिडन्त पक्का गरेको हो ।

विहीबार पुस २८ गते फाईनल खेल हुने संयोजक प्रकाश न्यौपानेले बताए ।
पहिलो सेमीफाईनल खेलमा वडा नं. २ ले टस जितेर ब्याटिङको निम्तो दिएपछि मैदान छिरेको वडा नं. ४ का ब्याट्सक्यानहरुले १९.२ ओभरमा सबै विकेट गुमाएर ८२ रनको लक्ष्य खडा गरेका थिए । उसका लागि शिखर चन्दले २२ तथा सुलभ ढुगानाले ११ बाहेक अन्य ब्याट्सम्यानहरुले दोहोरो रन जोड्न सकेनन । कम स्कोरमा रोक्न वडा नं. २ का वसन्त खत्रीले ४ तथा प्रज्वल पौडेलले २ विकेट लिए । झिनो लक्ष्य वडा नं. २ का ब्याट्सम्यानहरु १६.५ ओभरमा केवल ४७ रनमा समेटिए । उसका लागि महेन्द्र सुवेदी क्षेत्रीले २३ बाहेक अन्य ब्याट्सम्यान दोहोरो रन जोड्न सकेनन । वडा नं ४ को जितमा धिरेन राकेश मगरले शानदार ४ तथा सुजन न्यौपानेले २ विकेट लिएका थिए ।

खेलमा वडा नं. ४ का धिरेन राकेश मगर म्यान अफ दी म्याचबाट पुरस्कृत भए ।
यसैगरी दोस्रो सेमीफाईनल खेलमा वडा नं. १७ ले टस जितेर १४ ओभरमा सबै विकेट गुमाएर ६६ रनको लक्ष्य खडा गरेको थियो । उसका लागि रामकुमार थापाले १८ र सागर चौधरीले १६ रन बनाए । कम स्कोरमा रोक्न वडा नं १ का विशाल न्यौपानेले ४ तथा गणेश गुरुङले २ विकेट लिएका थिए ।

कम स्कोरलाई पछ्याएको वडा न.ं १ का ब्याट्सम्यानलाई लक्ष्य भेटाउन अन्तिम विकेट र अन्तिम बलसम्म कुर्नुपरेको थियो । वडा नं. १ का विपिन भट्टराई नटआउट १९ रन खेल्दै १९.५ ओभरमा टिमलाई विजयी बनाए । उनीसंगै बिशाल न्यौपाने ११ रनको योगदान दिएका थिए । वडा नं. १७ का मुनेश्वर चौधरीले ३ तथा कुलदीप मल्लाहले २ विकेट लिएपनि जितका लागि पर्याप्त भएन । खेलमा वडा नं. १ का विपिन भट्टराई म्यान अफ दी म्याचबाट पुरस्कृत भए ।