खोज

लमही २६ पुस ।

केही महिनादेखि अस्तब्यस्त बनेको लमही नगरपालिकाको विवाद साम्य भएको छ । विवादका कारण सुचारु हुन नसकेको लमही नगरपालिकाले सेवा दिन थालेको छ ।

प्रमुख प्रशासकीय अधिकृतको विषयलाई लिएर आन्दोलन चर्किएको थियो । वडाध्यक्षहरु र कर्मचारीहरुले प्रशासकीय अधिकृत गेहेन्द्र बहादुर डाँगीलाई स्विकार गर्न नसकिने भन्दै आन्दोलन गर्दै आएका थिए ।

पुनः प्रशासकीय अधिकृतमा डाँगी नै हुनेगरी सोमबार त्रिपक्षीय सम्झौता अनुसार वडाध्यक्ष र कर्मचारीहरुको आन्दोलन फिर्ता भएको छ । मन्त्रालयले तत्काललाई अर्काे प्रशासकीय अधिकृत पठाउन नसकिने बताएपछि बहालमा रहेका डाँगीबाटै काम गराउन सहज वातावरण निर्माण गरिएको लमही नगरपालिकाका प्रवक्ता मोहन गिरीले बताए ।

उनले अधिकृत बेगर जनताका कामहरु रोकिएको र त्यसलाई निराकरण गर्न डाँगीलाई नै स्विकारिएको बताए । ‘जनताका कामहरु रोकिए, धमाधम हुनुपर्ने योजनाका कामहरु सुचारु हुन सकेन”– प्रवक्ता गिरीले भने–“नगरपालिका सहज तवरबाट चलाउन हाकिम त चाहियो नि ।” कि मन्त्रालयको अनुसार अर्को हाकिम कुर्न सक्नुप¥र्यो त्यसो गर्दा नगरपालिका झन लथालिङ्ग हुने भयो, बाध्यात्मक परिस्थितिबाट पालिकालाई जोगाउन खोजिएको हो”–गिरीले भने ।

त्रिपक्षीय छलफल र सहमति भएपछि आफ्ना आन्दोलनहरु फिर्ता भएको लमही नगरका प्रशासनिक प्रमुख महेश थापा ठेडीले बताए । “हाकिम साबले आफुमा भएका ज्यादतीहरु अन्त्य गर्दै आत्मियताका साथ काम गर्ने र गराउने छु भनी सम्झौता गर्नुभयो”– प्रमुख थापाले भने–“पालिकालाई समृद्ध बनाउन हाम्रो पनि भूमिका रहन्छ नि ।”

सहमति पश्चात तत्काल बसेको कार्यपालिका बैठकले अधिकृत डाँगीलाई निरन्तरता दिन मन्त्रालयलाई अनुरोध गर्ने निर्णय गरेको छ । साथै अवैधानिक भन्दै ५ वटा नियुक्तीलाई बदर समेत गरेको छ । बैठकले राजनीतिक सल्लाहकार, शैक्षिक सल्लाहकार, प्रेस संयोजक, प्रेस सल्लाहकार र स्वकीय सचिव पदलाई बरखास्त गरेको वडा नम्बर १ का वडाध्यक्ष दामोदर पौडेलले जानकारी दिए ।