खोज

बुटवल, २१ पुस ।

तिलोत्तमा नगरमा जारी तिलोत्तमा मेयर कप क्रिकेट प्रतियोगिता २०७९ मा वडा नं. २ र वडा नं ६ विजयी हुँदै दोस्रो चरणमा प्रवेश गरेका छन् । तिलोत्तमा नगरपालिकाको आयोजना तथा नवजिवन क्लबको सहआयोजनामा नवजिवन खेलमैदानमा भएको पहिलो खेलमा वडा नं. २ ले वडा नं ७ माथि ९२ रन तथा दोस्रो खेलमा वडा नं. ६ ले वडा नं १४ माथि १ सय १४ रनको फराकिलो जित निकालेको हो ।

पहिलो खेलमा टस जितेर ब्याटिङको निर्णय गरेको वडा नं. ६ ले निर्धारित २० ओभरमा ६ विकेटको नोक्सानीमा १ सय ७६ रनको लक्ष्य खडा गरेको थियो । उसका लागि सागर केसीले ३९ र निलेस केसीले ३८ रनको योगदान दिए । वडा नं. ७ का सन्तोष क्षेत्री र सुरज क्षेत्रीले समान २–२ विकेट लिए । मध्यम लक्ष्य पछ्याएको वडा नं. ७ केवल १५.५ ओभरमा ८५ रनमा समेटिएको थियो । उसका लागि सन्तोष क्षेत्रीले २८ र किरण पाठकले १८ रन बनाएका थिए । कम स्कोरमा रोक्न वडा नं २ का महेन्द्र सुवेदी क्षेत्रीले ४ तथा दीपक पाण्डेले २ विकेट लिएका थिए । खेलमा महेन्द्र सुवेदी क्षेत्री म्यान अफ दी म्याचबाट पुरस्कृत भए ।

यसैगरी दोस्रो खेलमा वडा नं ६ ले टस जितेर ब्याटिङको निर्णय गर्दै निर्धारित २० ओभरमा ६ बिकेटको नोक्सानीमा १ सय ८१ रनको लक्ष्य खडा गरेको थियो । वडा नं ६ का ३ जना खेलाडीले अर्धशतक बनाए । थमन स्याङजालीले ५९, बिकल अधिकारीले ५२ र सम्राट थापाले ५१ रनको योगदान दिएका थिए । वडा नं. १४ का सचिन केवटले ४ तथा प्रिन्स मल्लले १ बिकेट लिएका थिए । विशाल लक्ष्य पछ्याएको वडा नं. १४ का ब्याट्सम्यानहरु १४.५ ओभरमा केवल ६७ रनमा समेटिए । उसका लागि बिशाल सापकोटाले २५ र मनिष थापाले १४ रनबाहेक अन्य ब्याट्सम्यान दोहोरो रन जोड्न सकेनन् । कम स्कोरमा रोक्न वडा नं ६ का थमन स्याङजालीले ४ तथा सुदिप बस्नेतले ३ विकेट लिए । खेलमा थमन स्याङजाली म्यान अफ दी म्याचबाट पुरस्कृत भए ।

शुक्रबार पहिलो खेल वडा नं १० र ९ तथा दोस्रो खेल वडा नं १३ र १७ का बीचमा हुने संयोजक प्रकाश न्यौपानेले बताए । पुस २८ गतेसम्म संचालन हुने प्रतियोगिता आयोजना गर्न ५ लाख रुपैया खर्च हुने अनुमान रहेको छ ।