खोज

दाङ, २१ पुस ।

थारु समुदायको महान चाड माघ पर्वको अवसरमा घोराहीमा हुन लागेको माघ सांस्कृतिक महोत्सव २०७९ को सबै तयारी पूरा भएको आयोजकले जनाएको छ । थारु कल्याणकारिणी सभा दाङका अध्यक्ष एवम् महोत्सव मुल आयोजक समिति संयोजक भुवन चौधरीले यही पुस २२ गतेबाट हुन लागेको दुई दिने माघ महोत्सवको सबै तयारी पूरा भएको बिहीबार पत्रकार सम्मेलन गरी जानकारी गराएका छन् ।

‘थारु अगुवाहरूसँगको छलफलपछि यो पटक केही नयाँपनका साथ माघी महोत्सव गर्ने तयारी गरेका छौँ’, उनले भने, ‘संस्कार, संस्कृति जोगाउन थारु कला संस्कृति प्रस्तुति गरिने भएको छ । नाचगानले मात्रै नहुने भएपछि यो पटक रचनात्मक रुपमा माघी महोत्सव हुनेछ । ’थारु कला संस्कृति, भेषभुषा, परम्परा सबै पछिल्लो पुस्ताले जोगाउने जिम्मेवारी भएका कारण विगत ८–१० वर्षयता बर्सेनि माघी महोत्सव गर्दै आएकोमा यो पटक अझ पृथक रुपमा कार्यक्रम गर्न लागिएको उनले बताए ।

‘गाउँगाउँबाट पुराना भेषभुषासहितका रहनसहन झल्काउने नाचगान आउने छ’, उनले भने, ‘महोत्सवले थारु कलासंस्कृतिलाई चिनाउने छ ।’ नाचगान, आदिवासी खाना, थारु युवा तथा गैर थारुलाई संस्कृतिमा आकर्षित गर्ने गरी जिल्लाका सबै ठाउँबाट ७० बढी सांस्कृतिक कार्यक्रम महोत्सवमा देखाउन लागिएको छ ।

झाँकी सहितको र्यालीले बिहान साढे ११ बजेबाट ट्राफिक चोकबाट शुरु हुने र त्यसमा समग्र थारु समुदायले प्रयोग गर्ने सरसामानसहितको सांस्कृतक पहिचान हुनेछ । विभिन्न उपसमिति गठन गरि तयारी गरिएको हुँदा यो पटक थप व्यवस्थित हुने र थारु तथा गैर थारु समुदायको उल्लेख्य सहभागीता रहने अपेक्षा गरिएको आयोजकले जनाएको छ । यस्तै, महोत्सवमा थारु रहनसहनका खानपान, थारु संग्रहका पुस्तक प्रदर्शनीका रुपमा पनि राखिने भएको छ । घोराही १५ स्थित जिल्ला समन्वय समितिको परिसरमा रहेको शहिद मन्चमा महोत्सव स्थल बनाइएको छ । माघी पर्व थारु समुदायको पहिचानको चाड पनि भएकाले यसलाई निकैमहत्वका साथ लिने गरिएको छ । थारु बाहुल्यता रहेको दाङ जिल्लामा अहिले माघीको रौनक छाएको छ । यसलाई थारु समुदायले नयाँ वर्षको रुपमा लिने गर्दछन् ।