खोज

बुटवल, २० पुस ।

चिसो बढ्दै गएपछि बुटवल माध्यमिक विद्यालयका बालबालिकालाई न्यानो पोशाक प्रदान गरिएको छ । बुटवल माध्यमिक विद्यालय बुटवलका पुर्व विद्यार्थी समूह एसएलसी व्याच २०४८ को आयोजनामा एक कार्यक्रमका बीच बालबालिकालाई न्यानो पोशाक वितरण गरिएको हो । जाडो प्रभाव बढी रहेकोले यसबाट बालबालिकाहरुमा पर्ने असर न्युनीकरण गर्न उद्देश्यले बुटवल माध्यमिक विद्यालयमा इसिडी र कक्षा १ मा अध्ययनरत रहेका ६१ जना बालबालिकाहरुलाई स्विटर र टोपी वितरण गरिएको कार्यक्रम संयोजक नारायण खनालले जानकारी दिए । कार्यक्रममा विद्यालयका प्रधानाध्यापक होमबहादुर रायमाझीले पुर्व विद्यार्थीहरुले गरेको रचनात्मक कार्यको प्रशंसा गरे । उनले विद्यालयले शैक्षिक गुणस्तर सुधार गर्दै लगेको बताए ।

२०४८ एसएलसी व्याचका बुटवल मावि पुर्व विद्यार्थीहरुले केही दिन अगाडि शंकरनगर स्थित वनबाटिकामा भेला गर्दै बुटवल माध्यमिक विद्यालय लक्षित विभिन्न कार्यक्रम गर्ने निर्णय गरेको पुर्व विद्यार्थी तथा कार्यक्रमका परिकल्पनाकार सितु प्रसाद श्रेष्ठले बताए । सो समूहबाट आगामी दिनमा छात्रवृत्तित अक्षयकोष स्थापना लगायतका रचनात्मक काम निरन्तर गर्ने सोच समेत राखेको श्रेष्ठले बताए । आफूले पढ्को विद्यालय प्रति सबै पुर्व विद्यार्थीहरु एकजुट भई हातेमालो गर्नुपर्ने पुर्व विद्यार्थी ई. वसन्त श्रेष्ठले बताए ।

कार्यक्रममा पुर्वविद्यार्थी एकराज पाण्डेले यस विद्यालयमा अध्ययन गरी आज देश बिदेशमा महत्वपूर्ण स्थानमा पुगेर पुर्व विद्यार्थी इन्जिनियर, डाक्टर तथा विज्ञका रुपमा स्थापित भएर काम गरिरहेकोले उनीहरुको समेत विद्यालय विकासमा योगदान रहनुपर्ने बताए । कार्यक्रममा पु्र्व विद्यार्थी दिपकला पौडेल, खेम नारायण तिवारीले पनि मन्तव्य व्यक्त गरेका थिए ।