खोज

बुटवल, १६ पुस ।

नेपाल मदिरा ब्यवसायी महासंघ केन्द्रीय अध्यक्ष सोनाम शेर्पाले मदिरा ब्यवसायमा केही गलत ब्यक्तिका कारण समग्र पेशा धरापमा परेको गुनासो गरेका छन् । कारोबार अनुसार समयमा कर तिर्ने, कागजपत्र सही ढंगले राख्ने हो भने कुनै समस्या नआउने उनले दाबी गरे ।

मदिरा ब्यवसायी संघ, रुपन्देहीको १४ औ वार्षिक साधारण सभाको उदघाटन गर्दै केन्द्रीय अध्यक्ष शेर्पाले सरकारप्रति औला ठड्याउने भन्दा पनि पेशालाई शुद्धीकरणतर्फ लाग्नुपर्ने सुझाव दिए । ‘म कुरो कम, काम धेरै गर्नेमा विश्वास गर्छु’– उनले भने । ब्यक्ति र विचार दुबै सही हुनुपर्नेमा जोड दिंदै उनले आफ्नो काम सही समयमा गरिए कुनै समस्या नहुने बताए ।

पेशामा ईमान्दार नहँुदा आफ्नो दैनिकी नै मुद्दा मामिला र कारोबार मिलाउने मात्र बनेको भन्दै पेशाको शुद्धीकरणमा सबैले जोड दिन शेर्पाले आग्रह गरे । सुविधासम्पन्न संस्थाको भवन निमार्णमा एक करोड रुपैयाँको लागत जुटाउन सफल भएको उनले बताए । रुकुम जिल्लामा मदिरा निषेध गरेको अवस्थामा मुद्दा लडेर सफलता प्राप्त गरेको भन्दै ब्यवसायमा आउने समस्या समाधानमा एकजुट भएर लाग्नुपर्ने उनले बताए । बुटवल र भैरहवा बीचमा भएको विवादको विषयलाई लिएर उनी समाधान गर्ने प्रतिवद्घता जनाए । ‘म सधै सही विषयको पक्षमा उभिने छु’– उनले भने ।

कार्यक्रममा आन्तरिक राजश्व कार्यालय भैरहवाका कर अधिकृत जग्गुलाल खनालले सरकारबाट लिईएको लक्ष्य प्राप्त नगरेको कारण अनुगमन अघि बढाउन बाध्य भएको बताए । राज्य आर्थिक कठिनाईमा रहेको र लक्ष्यभन्दा कम प्राप्ति भएको हँुदा सरकार बाध्य भएर कर कानुनको पालना गराउन लागेको उनको दाबी छ । ‘यो वर्ष बजार अनुगमन वर्षको रुपमा सरकारले मनाउन लागेको छ’– उनले भने । कार्यालयले मंसिरमा ६० प्रतिशत लक्ष्य हासिल गरेको र पुसमा केवल ९ प्रतिशत मात्र लक्ष्य हासिल गर्न सफल भएको तथ्यांक दिदै उनले सबैभन्दा बढी मदिरा उद्योगसंग करको सरोकार राखिने हँुदा पनि अनुगमनलाई कडाई गरिने बताए । मदिरा अवैध र अन्तशुल्कको स्टिकर अवैध जस्ता दुबै प्रकारको समस्याहरु देखिएको उनले बताए ।

कार्यक्रममा महासंघका निवर्तमान अध्यक्ष कृष्ण नेपालले संस्था स्थापनाको मूल उद्देश्य अनुसार अघि बढेको बताए । मदिरा ब्यवसायी देशभरिकै अब्बल संस्था भएको उनले दाबी गरे । देशब्यापी बिस्तार र संगठित गर्ने काम गरी एकतावद्घ गर्न सफल भएको उनले बताए ।

संस्थागत रुपमा अघि बढाउने कामहरु गरिरहेको भन्दै उनले ब्यवसायीहरु मिल्नुको विकल्प नरहेको बताए । अवैध मदिराको परिभाषा प्रति प्रहरी प्रशासनको दृष्टिकोण सही हुनुपर्ने उनले सुझाव दिए । उद्योगबाट उत्पादित मदिरामा ट्याग र शिल लगाएर ब्यवसायीकोमा पुग्दा गलत ढंगबाट गरिने गरेको उनले दुःखेसो गरे ।

कार्यक्रममा महासंघका केन्द्रीय उपाध्यक्ष मृगेन्द्रगोविन्द श्रेष्ठले हरेक वस्तुको आ–आफ्नो ठाउँमा महत्व रहेको बताए । मदिरा सेवनले नभई अत्यधिक मदिरा सेवनका कारण दुर्घटना हुने कुरा समाजमा सही ढंगको ब्याख्या र सचेतना जगाउन जरुरी रहेको उनले बताए ।

कार्यक्रममा महासंघका केन्द्रीय महासचिव तारानाथ ढुंगानाले महत्वकांक्षी योजनाहरु अघि बढाएको बताए । ईच्छाशक्तिबाट योजना पूरा हुने उनले बताए । एकअर्काको अस्वस्थ प्रतिस्पर्धा र सरकारको नीतिका कारण मदिरा ब्यवसायीहरु आर्थिक समस्यामा आईपरेको उनले बताए । बैकको ब्याज र मजदुर पाल्न नसक्ने अवस्थामा आईपरेको अहिलेको अवस्थामा बाध्यकारी रुपमा अडिटका लागि फाईदा देखाउनुपरेको दुःखेसो गरे ।

कार्यक्रममा लुम्बिनी मदिरा ब्यवसायी संघका अध्यक्ष गिरिराज पौडेलले मदिरा ब्यवसायीहरुको हकहितसंगै समस्यामा हातेमालो गर्दै आएको बताए । प्रदेशका सबै जिल्लाहरुमा शाखा स्थापना गर्ने र क्रियाकलापहरु अघि बढाउने काम भैरहेको उनले बताए । नेपालमा प्रत्येक वर्ष मदिराको अन्तशुल्क बढाउँदा मूल्य बढी पर्ने समस्या सबैभन्दा मुख्य भएको उनले बताए ।

कार्यक्रममा पुर्व अध्यक्ष खिम बहादुर खत्रीले ब्यवसायीहरुको क्षमता विकाससँगै संस्थागत विकास, धेरै सामाजिक कार्यमा योगदान दिएपनि समाजबाट हेर्ने दृष्टिकोण परिवर्तन नभएको गुनासो गरे । आफ्नै कारणले समस्या उत्पन्न भएको उनले दाबी गरे । देशमा आर्थिक तरलता र मन्दीको कारण समस्या सबै क्षेत्रमा रहेको उनले बताए । उधारो विक्रि वितरण रोक्न सके अहिलेको समस्या सुल्झने उनले बताए । शाखाको भवन निर्माण कार्यलाई अघि बढाउन उनले सुझाव दिए ।

कार्यक्रममा संघका महासचिव किशोर पन्त, सल्लाहकार दिनेश कुमार श्रेष्ठ, बुटवल उद्योग वाणिज्य संघका अध्यक्ष उज्वल कसजूले ब्यवसायिक हितसंगै सामाजिक कार्यमा संघको योगदान महत्वपूर्ण रहेको बताए ।

कार्यक्रममा संस्थाका सदस्य हरि पाण्डे, राजु खत्री, देवदह नगर कमिटीलाई उत्कृष्ट कार्यसम्पादन बापत सम्मानपत्रबाट सम्मान गरिएको थियो । संघमा पाँचसय बढी सदस्यहरु आवद्घ रहेका छन् ।