खोज

दाङ ,१६ पुस ।

साना साना प्याजका मुठा लहरै राखेर बसेका महिला । बाटो हिंड्ने जतिलाइ प्रायः नछुटाई भन्ने गर्छ्न प्याजको बेर्ना लैजानुस्, मिलाएर दिउँला नि कति लैजानु हुन्छ ? यो दृश्य हिजोआज घोराही – १८ रझेना जाने बाटोको पिपल बोटको वरिपरिको हो । दाङको देउखुरीबाट घोराही बजारमा प्याजका बेर्ना बिक्री गर्न आएका महिलाले दैनिक आजभोलि यसरी नै सडक व्यापार गरिरहेका छन् । लमही नगरपालिका –७ सेमरवा कि झुन्डी चौधरीले एक कठ्ठा जमिनमा राखेको प्याजको बेर्ना बिक्रीका लागि घोराही आएको बताइन् । एक किलो बिउबाट २० हजार रुपैयाँ फाइदा गरेको उनले बताइन् ।

गत बर्ष ५ हजारको बीउ किनेर राखेको ९० हजारको प्याजका बेर्ना बेचेको उनले बताइन् । प्याजका बेर्ना बिक्रीबाट राम्रो आम्दानी हुने गरेको उनको भनाई छ । उनले तरकारी खेती र प्याजको बिरुवा बेचेर १० कठ्ठा जमिन जोडेको बताइन् ।

झुन्डी चौधरीले बिगत १० बर्षदेखि प्याजका बेर्ना बिक्री गर्न थालेको बताइन । पहिले पहिले गाउँ घरमा सबैभन्दा गरिब आफू भएको जस्तो लाग्थ्यो । कसैले दुइचार सय रुपैयाँ सापटी पनि दिदैनथे । आजभोलि अरुलाई सहयोग गर्ने भएको उनले बताइन् । प्याजको बीउ राखेको एक महिनामा रोप्नका लागि तयार हुन्छ । असोजमा बेर्ना राखेको कात्तिकदेखि बिक्री गर्न सुरु गर्छौ । मङ्सिर, पुस, माघ महिना सम्म प्याजका बेर्ना बिक्री हुन्छन् । “एउटा सिजनमा ९० हजारदेखि एक लाख रुपैयाँ सम्म कमाई हुन्छ”, उनले भनिन् । धेरै मेहनत र लगानी गर्नु नपर्ने भएका यो पेसा सजिलो लागेको छ ।

सोही ठाउँकी गीता चौधरीले एक कठ्ठा जमिनमा प्याजको बेर्ना राखेको बताइन् । ६ हजार रुपैयाँको बीउ किनेको यसपालि ८० हजार रुपैयाँको बेर्ना बिक्री गर्ने लक्ष्य रहेको बताइन् । “६ जनाको परिवार छ सबै कृषि पेसामा आबद्ध छौ”– उनले भनिन् । लमही सानो बजार छ त्यहाँ धेरै बिक्री हुँदैन । घोराही बजार ठूलो छ धेरै बिक्री हुने भएकाले यता आएको उनले बताइन् ।
गाउँका धेरै जनाले प्याजको बेर्ना राख्ने गरेका छन् । गाउँमा पुरुषहरुले घरमा अन्य काम गर्ने भएकाले गाउँभरिका सबै महिला प्याजका बेर्ना बिक्रीका लागि घोराही आउने गरेको उनले बताइन् ।

“बिहान ५ बजे गाउँको हाइसले सबैलाई ल्याएर आउँछ । दिनभरी यही प्याज बिक्री गर्छौ, बेलुका ६ बजे सोही गाडीमा घरमा जान्छौ । गाडीको सुविधा भएकोले आउन जान सजिलो भएको छ”–उनले भनिन् । बेर्ना उत्पादन देउखुरीमा राम्रो हुने र फल उत्पादन दाङमा राम्रो हुने भएकाले बेर्ना बिक्री घोराहीमा धेरै हुने उनको भनाई छ ।