खोज

अर्घाखाँची, १५ पुस ।

पाणिनी गाउँपालिका–२ पोखराथोकका वडाध्यक्ष एवं किसान चन्द्रकान्त पौडेलले बारीमा फलेका सुन्तला विगतमा बोटमा नपाक्दै बिक्री गरिहाल्थे । छिटोछिटो बुटवल र तराइका व्यापारीलाई कम मूल्यमै निर्यात गरिन्थ्यो । अहिले बिक्री गर्न हतार छैन । बोटमै पहेंलपुर हुन दिएर छिप्पाउने र टिपेर सिधै स्टोरमा राख्ने गरेका छन् ।

‘यो बेला सिजन भएकाले जहाँ पनि सुन्तला पाइन्छ, त्यसैले छिटफुट मात्रै बिक्री गरेका छौं,’ उनले भने, ‘धेरैजसो सुन्तला स्टोरमा राख्ने बेसिजनमा बिक्री गर्ने हो । त्यो बेला भाउ दोब्बर हुन्छ ।’ उनले २० क्वीन्टल सुन्तला स्टोरमा राखेको बताए । ‘बोटमै राम्रोसँग पकाएर मात्रै टिप्दै स्टोरमा राखेको छु,’ उनले भने, ‘बिक्री नहोला कि भन्ने चिन्ता छैन । आएका ग्राहकलाई दिएका छौं, खोजेका छैनौं ।’ उनले ४ सय भन्दा बढी सुन्तलाका बोटले उत्पादन दिएको छ । प्रदेश सरकार र पाणिनि गाउँपालिकाको आर्थिक सहयोगमा पोखराथोकमा ४ सय मेट्रिकटन क्षमताको कोल्डस्टोर निर्माण भएको छ । यसपाली मौसमले साथ दियो । रोग, किराले आक्रमण गरेन । गतवर्ष भन्दा झण्डै दोब्बर सुन्तला फलेको छ । गाउँका धेरैजसो कृषकले सुन्तला बोटमै छिप्पाएको पौडेलले बताए ।

अहिले काठमाडौं प्रतिकिलो एक सय देखि एक सय बीस र बुटवलमा ८५÷९० रुपैयाँमा बिक्री भएको शिवशक्ति मिश्रित कृषक समुहका अध्यक्ष चिरञ्जीवि पौडेलले बताए । गतवर्ष परीक्षणको लागि केही सुन्तला राखिएको थियो । त्यो बेला राम्रो आम्दानी भयो । गतवर्ष कोल्डस्टोरमा राखेको सुन्तला फागुन÷चैतमा बिक्री गर्दा डेढ सय रुपैयाँ किलोमा बिक्री भएको थियो । यसपालि त्यति मूल्यमा बिक्री होला भन्ने अनुमान उनको छ । ४ सय मेट्रिकटन क्षमता रहेको कोल्डस्टोरमा अहिलेसम्म ३ सय मेट्रिकटन सुन्तला राखिसकेको उनले बताए । कोल्डस्टोर भरिन्छ । अहिलेसम्म २९ जनाले स्टोरमा राखेका छन् । अहिले सुन्तलाका दाना पनि ठुला छन् । असिना नपरेपछि र रोग किरा नलागेकाले दाना राम्रो छ । बोटमा लटरम्मै फलेको छ । गतवर्षभन्दा झण्डै दोब्बर जस्तै दाना फलेको पौडेलले बताए ।

‘कोल्डस्टोरले किसानलाई सबैभन्दा धेरै फाइदा भयो,’ उनले भने, ‘यो सिजनको बेला मूल्य घटेर जतिमा झरेपनि बिक्री गर्नुपथ्र्याे, अहिले त्यो चिन्ता छैन । गाउँमा आएका ग्रहाकलाई रित्तो पठाएका छैनौं, बाँकी रहेको सुन्तला सबै स्टोरमा राख्छौं ।’ पाणिनि गाउँपालिका–१ सिम्ले गाउँमा सबैभन्दा धेरै सुन्तला उत्पादन हुन्छ । यहा“ अहिले ५ करोड रुपैयाँ बराबर मुल्यको सुन्तला उत्पादन हुने अनुमान गरिएको उनले बताए । स्टोरमा राखेर महंगो मुल्यमा बिक्री गर्न पाउँदा बिक्री गर्नतिर खासै रुची छैन ।