खोज

चन्द्रौटा(कपिलवस्तु), १३ पुस ।

कपिलवस्तुको क्षेत्र नम्बर ३ नेपाली कांग्रेसमा विवाद सुरु भएको छ । गत स्थानीय निर्वाचन र संसदीय निर्वाचनमा असहयोग गरेको भन्दै दुई पक्ष आरोप प्रत्यारोपमा उत्रिएका छन् ।

स्थानीय निर्वाचनदेखि संसदीय निर्वाचनमा पार्टीलाई अन्तरघात गरेको भन्दै कांग्रेसभित्र संस्थापन पक्ष र इतर पक्षबीचको विवाद उत्कर्षमा पुगेको हो । संसदीय निर्वाचनमा बाम गठबन्धनका तर्फबाट उम्मेदवार बनेका अभिषेक प्रताप शाहले स्थानीय तहमा राप्रपाका उम्मेदवारलाई सहयोग गरेको आरोप लागेको छ ।

विपक्षी दलका प्रतिद्वन्दी स्थानीय निर्वाचनमा उम्मेदवार बनेका हुमाकन्त खनाल पराजित भएपछि शाहलाई आरोप लागेको हो । संसदीय निर्वाचनमा उम्मेदवार बनेका शाह आफू पराजित भएपछि कांग्रेसका केही नेताहरु विपक्षी पार्टीलाई सहयोग गरेको आरोप लगाएका छन् ।

कांग्रेसका जिम्मेवार पदमा रहेर पार्टीको विधान, नीति सिद्धान्त र पार्टी हित विपरीत कार्यहरूमा प्रत्यक्ष संलग्न आफ्ना उम्मेदवारलाई हराउने विपक्षीलाई जिताउने भन्दै आरोप लगाइएको छ । केही नेताहरुले क्रियशील सदस्यलाई समेत जप्रपा, एमाले लगायत शाहले प्रतिद्वन्दी दललाई मतदान गर्न उर्दी जारी गर्ने र पार्टी संगठनलाई कमजोर बनाउने गतिविधिमा निरन्तर सक्रिय रहि सहयोग गरेको जारी विज्ञप्तिमा उल्लेख छ ।

असहयोग गरेका कार्यकर्तालाई कांग्रेसका विधान अनुसार साधारण सदस्य समेत नरहने गरी शाहले तत्काल कारवाहीको माग गरेका छन् । गुटबन्दीको नाममा अन्तरघात गर्नेहरु आगामी दिनमा निरुत्साहित हुने गरि माग गरिएको शाहद्घारा हस्ताक्षरित विज्ञप्तिमा जनाइएको छ ।

शाहले जिल्ला सभापति अब्दुल कलामसहित उपसभापति हुमाकान्त खनाल, सचिव प्रेम बहादुर रायमाझी, क्षेत्रीय सभापति ब्रम्हानन्द उपाध्याय, जिल्ला प्रवक्ता ईश्वरी प्रसाद पाण्डे, सदस्य हरि पोख्रेल, प्रदेशसभा सदस्य पदका उम्मेदवार बिरेन्द्र कनोडिया र मधु पोख्रेल लगायत दर्जन बढीलाई साधारण सदस्य समेत नरहने गरि कारवाहीको माग गर्दै केन्द्रीय कार्यालयलाई पत्र पठाएका छन् ।

यता क्षेत्रीय सभापति ब्रम्हानन्द उपाध्यायले अभिषेक प्रताप शाह सहित ७ जनालाई कारवाहीको लागि जिल्ला सभापतिलाई पत्र लेखेका छन् । कृष्णनगर नगरपालिकाका नगरप्रमुख रजत प्रताप शाह, जमिल खाँ, किफायत उल्ला खाँ, मथुरा यादव लगायतलाई स्थानीय तह तथा संसदीय निर्वाचनमा पार्टी उम्मेदवार विरुद्ध गतिविधि गरेको आरोप लगाइएको विज्ञप्तिमा उल्लेख छ ।