खोज

बुटवल, १२ पुस ।

सुनचाँदी व्यवसायीहरुले विभिन्न क्षेत्रबाट आफ्नो व्यवसायमा असुरक्षा बढेर गएको हुँदा व्यवसाय पलायन बढेर जाने खतरा देखिएको भन्दै व्यावसायिक सुरक्षाको माग गरेका छन् । उनीहरुले आपराधिक तत्वबाट हुने चोरी, लुटपाट तथा सुनको अभावमा व्यवसाय सञ्चालन गर्न निकै कठिन भएको बताउँदै त्यसमा राज्यको ध्यानाकर्षण गराएका छन् ।

सोमवार बुटवल सुनचाँदी व्यवसायी संघ, बुटवलको तेस्रो बार्षिक साधारणसभाको उद्घाटन सत्रमा बोल्ने सो व्यवसायीका अगुवाहरुले यस्तो धारणा राखेका हुन् । बुटवल उपमहानगरपालिकाका प्रमुख खेलराज पाण्डेले बुटवल नगरमा रहेका सुनचादी व्यवसायीहरुको संरक्षण, व्यवस्थापन र सुरक्षाको जिम्मेवारी स्थानीय सरकारको पनि रहेको हुँदा त्यसमा आफु प्रतिवद्ध रहेको बताए । व्यवसायीहरुको समस्यालाई सम्बोधन गर्न योजनाबद्ध रुपमा कामहरु गर्ने बताउँदै सुनचाँदी व्यवसायीहरुको प्रमुख समस्याका रुपमा रहेको सुरक्षाको विषय राज्यकै जिम्मेवारी भएको हुँदा बुटवल सुनचाँदी व्यवसायीहरुका लागि सुरक्षित क्षेत्र हो भन्ने बनाउन सबैमा आग्रह गरे ।

सम्बोधनका क्रममा पाण्डेले बुटवलमा छरिएर रहेका सुनचाँदी व्यवसायीहरुलाई एक छातामुनी राख्ने व्यवस्था गर्ने सोंच नगरपालिकाले गरेको उल्लेख गर्दै त्यसमा व्यवसायीहरुको स्पष्ट धारणा दिन अनुरोध गरे । उनले बुटवलको वजार विविधिकरणको अभावले व्यावसायिक पलायन बढेको हँुदा त्यसमा गम्भीर बनेर वजारलाई चलायमान बनाउने स्थानीय तह र व्यवसायीहरु सहकार्य गरेर अगाडि बढ्ने समय आएको धारणा राखे ।

नेपाल सुनचाँदी व्यवसायी महासंघका केन्द्रीय उपाध्यक्ष जोगलाल विकले सुनचाँदी व्यवसायीहरुका समस्याका बारेमा राज्यलाई धेरै पटक अवगत गराएको भएपनि नीतिगत रुपमा कुनै परिवर्तन हुन नसकेको बताउँदै काँचो सुनको अभावले व्यवसायीहरुले आफ्नो व्यवसाय बन्द गर्नु पर्ने अवस्थामा आएको उल्लेख गरे ।

नेपाल सुनचाँदी व्यवसायी महासंघका केन्द्रीय सदस्य एमवी विश्वकर्माले सुनचाँदी व्यवसाय अति सम्बेदशील व्यवसाय भएका कारण यसलाई सञ्चालन गर्दा अति गम्भीर भएर गर्नु पर्ने धारणा राखे । महासंघका अर्का केन्द्रीय सदस्य दीपक कुमार विकले परम्परागत रुपमा चलेको हाम्रो व्यवसाय एवं व्यावसायिक संस्थामा पुस्तान्तरण हुन नसक्दा समस्याहरु ज्युका त्यू रहेको उल्लेख गर्दै कानुनी रुपमा हामीले झेल्नु परेका समस्या र राज्यले हामीलाई हेर्न दृष्टीकोणमा परिवर्तन आउनु जरुरी भएको बताए ।

संघका अध्यक्ष गकुल विश्वकर्मा, सचिव चुरामणी विक, उपाध्यक्ष मिलन विश्वकर्मा, बुटवल उद्योग वाणिज्य संघका अध्यक्ष उज्जवल कसजु, रुपन्देही व्यापार संघका महासचिव दयानिधि भण्डारी, नेपाल घरबहाल सरोकार संघ, रुपन्देहीका अध्यक्ष राजु लिगल, बुटवल वडा नं. ४ का अध्यक्ष नरिश्वर पौडेल, रुपन्देही सुनचाँदी व्यवसायी संघका जिल्ला अध्यक्ष रामकिशन बिक, प्रदेश उपाध्यक्ष विक्रम सुनार, सिद्धार्थनगर सुनचाँदी व्यवसायी संघका अध्यक्ष दिपक कौशल, विजेन कम्पनीका कोषाध्यक्ष विजेन कालिराज लगायत बोलेका थिए ।