खोज

चन्द्रौटा(कपिलवस्तु), १२ पुस ।

सुस्मिता थापा केसी हत्याकाण्डका आरोपीहरुबाट आक्रमण हुन सक्ने भन्दै पीडित परिवारले जीउज्यानको सुरक्षाको माग गरेका छन् । गृह मन्त्रालय शान्ति सुरक्षा अपराध नियन्त्रण शाखाले शान्ति सुरक्षाका लागि सम्बन्धित निकायलाई गत ७ गते पत्र काटेको छ ।

कपिलवस्तु बाणगंगा नगरपालिका वडा नम्बर ८ बस्ने सुस्मिताको माइती परिवारलाई कपिलवस्तुदेखि हेटौडा जिल्ला अदालत मकवानपुर सम्म आउजाउ गर्न हत्याकाण्ड आरोपीहरुबाट आक्रमण हुन सक्ने अवस्थालाई मध्यनजर गरी जीउ ज्यानको सुरक्षाको लागि मन्त्रालयमा निवेदन परेको छ ।

मकवानपुर जिल्ला हेटौडा उपमहानगरपालिका वडा नम्बर ४ सूर्य चोक स्थित आफ्नै घरको भान्सा कोठामा घरपरिवारको मिलिमतो र डिजाइनमा सुस्मिताको हत्या गरिएको थियो । अदालतमा २०७९ पुस १८ गते पेशी रहेकोले आरोपीहरुबाट शान्ति सुरक्षा तथा अपराध नियन्त्रण शाखाका अधिकृत लिलाधर अवस्थीको हस्ताक्षरित पत्र प्रहरी प्रधान कार्यालय नक्साल, जिल्ला प्रशासन कार्यालय मकवानपुर, जिल्ला प्रशासन कार्यालय कपिलवस्तुलाई पत्र पठाइएको छ ।

विगत एक वर्षदेखि सो हत्या विभत्स घटना भएकोले यसलाई समाधानका लागि सबैले आफ्नो ठाउँबाट लाग्नुपर्ने कपिलवस्तु प्रमुख जिल्ला अधिकारी धर्मेन्द्र कुमार मिश्रले बताए । सुस्मिता हत्याकाण्डको विषयमा सक्ने सहयोग, समन्वय र सुरक्षाको व्यवस्था गर्ने प्रतिबद्धता उनले जनाए ।

सुस्मिताका ठुलो बुवा हेम बहादुर खड्काले भने–“हामी यो दुई बर्षे अवधिमा पटकपटक हेटौडा अदालत पुग्यौं तर अदालतमा विभिन्न बहाना गराउँदै पटकपटक पेशी स्थगित गरियो । कपिलवस्तुदेखि हेटौंडा जानको लागि निकै खर्चिलो भएकोले मिल्छ भने जिल्ला परिवर्तन गरेर कपिलवस्तु आसपासका जिल्लामा ल्याउन पनि अनुरोध गर्दछौं । बर्षातको समय सुरु भएसँगै यातायातमा पनि समस्या हुने भएकाले कपिलवस्तु नजिकको जिल्लामा ल्याउन माग गर्दछौं ।”

सुस्मिताको २०७७ असार १ मा हत्या भएको थियो । अहिले उनको हत्याकाण्डको करिब साढे दुई बर्ष बितिसकेको छ । मुद्दा सुनुवाइ गरिरहेका चार जना न्यायाधीशको यही असार २३ गते हेटौंडा अदालतको कार्यकालको अवधि पनि सकियो । तर मुद्दाको बारेमा फैसला हुन सकेको छैन ।

सुस्मिताका माइती पक्ष पटकपटक न्यायको लागि दुई बर्ष सम्म हेटौंडा जिल्ला अदालत धाउँदा पनि न्याय नपाएपछि पीडितको आशा निराशामा बदलिएको छ । दुई वर्षसम्म मुद्दा हेरिरहेका न्यायाधीशको कार्यकाल सकिएपछि अब आउने न्यायाधीशले पनि यो मुद्दामा यस्तो नअल्मलाउन पीडित पक्षले आग्रह गरेका छन् । पछिल्लो पटक असार ७ र २३ गते पेशी तोकेको भएपनि विभिन्न बहानामा पेशी स्थगीत गरिएको पीडित पक्षको भनाइ छ ।

केही साताअघि मात्र लुम्बिनी मुख्यमन्त्री कुलप्रसाद केसी, कपिलवस्तुका प्रमुख जिल्ला अधिकारी धर्मेन्द्र कुमार मिश्र, भरतपुर महानगरपालिकाकी प्रमुख रेणु दाहाल लगायतसँग सुस्मिताका बुबा, आमा, ठुलोबुबा, नेपाल स्वयंसेवक संघका केन्द्रीय अध्यक्ष खेमराज पौडेल लगायतको टोलीले ज्ञापन पत्र समेत बुझाएको थियो । नेपाल स्वयंसेवक संघका संस्थापक केन्द्रीय अध्यक्ष खेमराज पौडेलेको वर्ष पुस्तक पूर्व समीक्षा कार्यक्रममा यो घटना जिल्लाकै नभएर मानवलाई अहित रहेको बताए । बर्षाैंदेखि यस घटनाबारे आवाज उठाउँदै आएको समेत पौडेलले जनाए ।

कपिलवस्तुबाट विवाह गरी हेटौँडा गएकी सुस्मितालाई हेटौंडा उपमहानगरपालिका–४ मा २०७७ असार १ गते परिवार मिलेर तड्पाइतड्पाई हत्या गरिएको थियो । सो घटनामा मृतकका ५८ वर्षीय ससुरा प्रकाश थापा, ५० वर्षीया सासु तुलसा, नन्दहरू २७ वर्षीय दुर्गा, दुर्गाका श्रीमान अरुण कार्की र २३ वर्षीया नन्द सीता थापा समेत रहेका थिए ।

अहिले उनीहरु कारागारमा छन् । हत्यामा संलग्नमध्ये ससुरा प्रकाश र कान्छी नन्द सीतालाई सरकारी वकिलको कार्यालयले जीवन रहेसम्म कैद सजायको माग गर्दै आरोप पत्र दायर गरिसकेको अवस्था छ भने अरु तीन जना (दुर्गा, तुल्सा र अरुण) लाई आजीवन कैद सजायको माग गर्दै आरोप पत्र दायर गरिएको छ । तर न्यायाधीशले समयमा फैसला नगर्दा पीडित परिवार आक्रोशित छन् । घटनामा संलग्न रहेका आरोपीले सजाय पाउनुपर्ने भन्दै पीडित परिवारले माग गरेका छन् ।