खोज

दाङ, १२ पुस ।

राष्ट्र बैंकले वृद्धि गरेको बैंकको व्याजदरको विरोधमा लुम्बिनी प्रदेशभरका उद्योग वाणिज्य संघले दाङको घोराहीमा विरोध प्रदर्शन गर्ने भएका छन् । बैंक व्याजको विरोधमा आन्दोलन गर्दै आएका उद्योग वाणिज्य संघहरुले पुस १३ वुधबार विरोध प्रदर्शन गर्ने भएको दाङ जिल्ला उद्योग वाणिज्य संघका अध्यक्ष टंकसिंह बुढाथोकीले जानकारी दिए । नेपाल उद्योग वाणिज्य महासंघ लुम्बिनी प्रदेशको आयोजना तथा दाङ जिल्ला उद्योग वाणिज्य संघको संयोजनमा कार्यक्रम हुन लागेको हो ।

सबै उद्योग वाणिज्य संघहरुले बुधबार दिउँसो साढे १ बजे प्रदर्शन गर्ने जनाएका छन् । यद्यपि, ढुवानीका गाडीहरुले बिहान ९ वजे र्याली निकाल्ने भएका छन् । र्याली बहुद्देश्यीय सभा गृहबाट सुरु भएर बजार परिक्रमा गरेर सभाहलमा पुगी समापन गरिने छ । प्रदर्शनपछि जिल्ला प्रशासन कार्यालय दाङमार्फत ज्ञापन पत्र राष्ट्र बैंक, नेपाल सरकार, अर्थ मन्त्रालयमा पठाइने भएको छ । यस्तै, बुधबार हुने कार्यक्रमबाट आन्दोलनको थप कार्यक्रम घोषणा गर्ने तयारी गरिएको व्यवसायीले जनाएका छन् ।

आन्दोलनका विषयमा दाङ जिल्ला उद्योग वाणिज्य संघले दाङ चेम्वर अफ कर्मश, वस्तुगत समिती, तथा विभिन्न संघ संस्थाहरु संग छलफल भएको छ । छलफलमा सहभागीहरुले बैंकको व्याजको विरोधमा हुने आन्दोलनमा आफुहरुको तर्फबाट सक्रिय सहभागिता जनाउने बताएको संघका महासचिव महेन्द्र वुढाथोकीले जानकारी दिए ।

छलफल कार्यक्रम संघका अध्यक्ष टंकसिंह वुढाथोकीको अध्यक्षतामा भएको थियो । ब्याज वृद्धिले गर्दा व्यवसायीहरु समेत पलायन हुँदै गएका छन् । बुधबार हुने विरोध प्रदर्शनमा सहभागी सम्पूर्ण पीडित उद्योगी, व्यवसायी, आम नागरिकहरुमा दाङ जिल्ला उद्योग वाणिज्य संघले आग्रह समेत गरेको छ । बैंकको व्याजको विरोधमा अहिले देश भरका आन्दोलन भईरहेको छ ।