खोज

रोल्पा, १२ पुस ।

रोल्पामा अपांगता भएका व्यक्तिहरुले रोल्पा नगरपालिकाका नगरप्रमुख सुरेन्द्र थापा घर्तीलाई ज्ञापन पत्र वुझाएका छन् । रोल्पा नेत्रहीन संघ रोल्पाको आयोजनामा वुझाइएको ज्ञापन पत्रमा अन्य अपाङ्गता भएका व्यक्तिहरुको पनि उपस्थिति रहेको थियो ।

अपांगता भएका व्यक्तिहरु आर्थिक रुपमा गरिव र सामजिक रुपमा अपहेलित जीवन विताउन वाध्य भएको ज्ञापन पत्रमा उल्लेख गरिएको छ । आफुहरु देश भित्रै दोश्रो दर्जाको नागरिकको रुपमा जीउन वाध्य भएको उल्लेख गर्दै जीवन समेत अत्यन्तै कष्टकर रहेको उल्लेख गरिएको छ ।

“घर आँगनको सरकार भएका कारण स्थानीय सरकार अपाङ्गताका विषयमा बढी गम्भीर र जिम्मेवार वन्ने कुरामा दुई मत छैन” ज्ञापन पत्रमा भनिएको छ । सवैभन्दा नजिक भेटिने सरकार भएका कारण हामी रोल्पाली अपांगता भएका व्यक्तिहरुले स्थानीय सरकार खोज्दै आएको उल्लेख गरिएको छ ।

ज्ञापन पत्रमा रोल्पा जिल्लामा रहेका तीन वटा श्रोत कक्षाहरुमा श्रोत शिक्षकको सट्टामा साङ्ग शिक्षक रहेकाले ती कोटामा अपांग शिक्षक भर्ना गर्ने व्यवस्था मिलाउन माग गरिएको छ । यसैगरी तीनवटै श्रोत कक्षाहरुमा शिक्षाको गुणस्तर वृद्धिका लागि थप अपांगमैत्र शैक्षिक सामग्री र खेलकुद सामग्रीको यथोचित व्यवस्था गर्न, अपांगता भएका व्यक्तिहरुको आयआर्जन र सशक्तीकरणका लागि सीपमुलक तालिम तथा क्षमता विकास तालिमको व्यवस्था गर्न आग्रह गरिएको छ ।

ज्ञापन पत्रमा जिल्लाका तीनवटै श्रोत कक्षाहरुमा अपांगमैत्री भवन नहँुदा अपांगता भएका विद्यार्थीहरुले कठिनाई भोग्दै आएको हँुदा ती श्रोत कक्षाहरुलाई अपांगमैत्री वनाउन आवश्यक वजेट व्यवस्था गर्न आग्रह गरिएको छ । ज्ञापन पत्रमा तीनवटै विशेष कक्षाको पठनपाठनलाई थप प्रभावकारी बनाउन आवश्यक कार्ययोजना सहित अघि वढ्न पहल गर्न आग्रह गरिएको छ ।

रोल्पा नेत्रहीन संघ रोल्पाले पेश गरेको ज्ञापन पत्रमारोल्पाका तीनवटै श्रोत कक्षाहरुमा अध्यापन गराउने अपांग शिक्षक नभएकाले हाल जिल्लामै त्यस्तो जनशक्ति उपलव्ध भएकाले नगरपालिकावाट अनुदान शिक्षकको रुपमा ती विद्यालयहरुमा अपांग शिक्षक भर्ना गर्न पहल माग गरिएको छ ।

ज्ञापन पत्र वुझ्दै रोल्पा नगरपालिकाका नगरप्रमुख सुरेन्द्र थापा घर्तीले ज्ञापन पत्रवारे आफु गम्भिर रहेको वताएका थिए । अपांगता भएका व्यक्तिहरुको सामाजिक र आर्थिक सशक्तीकरणका लागि नगरपालिकाका सहकार्य गरेर अघि वढ्न तयार रहेको नगरप्रमुख घर्तीको भनाई थियो ।

कार्यक्रमको सहजीकरण रोल्पा नेत्रहीन संघ रोल्पाका सचिव शिशिर डाँगीले गरेका थिए । ज्ञापन पत्र वुझाउँदा अपांगता भएका विद्यार्थीहरुको समेत सहभागिता थियो ।