खोज

नेपालको ४४ औं प्रधानमन्त्रीको रुपमा नेकपा माओवादी केन्द्रका अध्यक्ष पुष्पकमल दाहाल (प्रचण्ड) लाई देशको नेतृत्व गर्ने आकस्मिक अवसर जुरेको छ । आईतवार विहानसम्म कांग्रेस माओवादीसहितको पाँचदलीय गठबन्धनको नेतृत्वमा नयाँ सरकार गठन हुने संभावनाका वीच दिउँसो एकाएक विकसित फरक राजनैतिक घटनाक्रमको करिव दुई घण्टामै प्रचण्डलाई सरकारको नेतृत्व गर्ने अवसर आएको छ । प्रचण्डले सोमबार साँझ राष्ट्रपति भवन शीतल निवासमा पद तथा गोपनीयताको सपथसमेत लिईसक्नुभएको छ । भनिन्छ– राजनीतिमा असम्भव भन्ने हुँदैन । आईतवार कांग्रेस माओवादी सहितको पाँचदलीय गठबन्धनको सरकार बन्ने प्रवल संभावनाका वीच दुई घण्टाभित्रै राजनैतिक परिस्थिति युटर्न भएर प्रचण्डलाई सरकारको नेतृत्व गर्ने आकस्मिक अवसर प्राप्त भयो । यसबाट सरकारको नेतृत्वमा पटक–पटक पुग्न सक्ने क्षमता राख्नुलाई प्रचण्डको नेतृत्व क्षमताकै खुबीका रूपमा लिनुपर्ने हुन्छ । एमाले अध्यक्ष ओली र माओवादी अध्यक्ष प्रचण्डवीच दुरी बढेको बेला भएको आकस्मिक एकताले नेपाली राजनीतिमा स्थायी शत्रु र मित्र भन्ने हुँदैन भन्ने पनि पुष्टी भएको छ ।

अव तेश्रोपटक देशको प्रधानमन्त्री बनेका प्रचण्डलाई सरकारलाई सफल बनाउन ठूलो दबाब हुनेछ । त्यसका निम्ति उनले सरकारलाई गति दिनुपर्ने अवस्था छ । अव फरक विशेषता बोकेको सातदलीय गठबन्धनलाई एक ढिक्का बनाएर अगाडि बढाउनु प्रचण्डको लागि ठूलो चुनौती हुनेछ । प्रचण्डको यस पटकको सत्तायात्रा सहज छैन । प्रधानमन्त्रीसँग यसपटक चौतर्फी अपेक्षा र दबाब छन् । शासन सञ्चालनमा देशले नैतिक मूल्य तथा मान्यताको अपेक्षा गरेको छ । मुलुकको संसदीय राजनीतिमा देउवा विकृतिको कारकका रूपमा चिनिएका छन । अव प्रचण्डमाथि पनि त्यो नियती दोहोरिने छैन भन्न सकिदैन । तैपनि यसपटक उनले आफूलाई सुधार गर्नेमात्र होइन, समग्र लोकतान्त्रिक पद्धतिप्रति उत्पन्न हुन लागेका वितृष्णा रोक्न पहल गर्छन भन्ने आशा छ । प्रधानमन्त्री प्रचण्डले लिने सबै निर्णयमा निर्मम समीक्षा हुनेछ । हिजो देउवाले गरेका बेठिक काम र व्यवहार प्रचण्डबाट दोहोरिए भने त्यो जनताका लागि स्वीकार्य हुँदैन । अहिले प्रचण्डको हातमा सत्ता एउटा भिन्न परिस्थितिमा आएको छ । तसर्थ सरकार विस्तारका क्रममा मन्त्री नियुक्तिमै उनीमाथि ठूलो दवाव हुनेछ । सात दललाई मिलाएर मन्त्रिपरिषद विस्तार गर्नु कम चुनौतिको विषय होइन । प्रचण्डले मन्त्रीको नियुक्ति र भोलि हुने अन्य नियुक्तिमा आफूलाई कति खरो उतार्न सक्छन्, त्यसबाट सरकारको भविष्य निर्धारण हुनेछ । सरकारको सफलता असफलता प्रमाणित हुनेछ । प्रचण्डमाथि अर्को गंभीर चुनौति छ– देशको अर्थतन्त्र सही दिशामा ल्याउनु । यो कठिन चुनौति पार लगाउन उनलाई दह्रो सहयात्रीको खाँचो छ । सरकारको नेतृत्व गर्ने जिम्मेवारी पाएका प्रचण्डका निम्ति लोकतान्त्रिक शासन व्यवस्थाको आदर्श प्रदर्शन गर्ने यो अवसर पनि हो । प्रचण्डले संसदलाई विधि निर्माणको थलो र त्यसप्रति आफू र मन्त्रिपरिषद्लाई व्यक्तिगत र सामूहिकरूपमा जिम्मेवार बनाउनुपर्छ । पाँचदलीय गठबन्धन भंग भएपछि बनेको सातदलीय गठबन्धनको महत्वपूर्ण नेताका रूपमा प्रचण्डले नेतृत्वको अवसर पाएका छन् । अव विधिसम्मत ढंगले सरकार सञ्चालन हुनुपर्छ । लोकतन्त्रमा पारदर्शिता पहिलो सर्त हुनुपर्छ । देशलाई भ्रष्टाचारमुक्त बनाउने संकल्प प्रचण्डका लागि राम्रो अवसर हुनेछ । देशमा देखापरेका विकृति, विसंगति, अस्थीरता लगायतका यावत समस्या नियन्त्रण र समाधानमा प्रचण्ड नेतृत्वको सरकारका चुनौति हुन । उनले देशको नेतृत्व गर्ने अवसर पाएका छन । अवको साढे दुई बर्ष देशको राजनीति प्रचण्ड वरिपरी घुम्नेछ । यो ऐतिहासिक एवं महत्वपूर्ण अवसर उनका लागि इतिहास निर्माण गर्ने मौका पनि हो । नयाँ सरकार जनउत्तरदायी हुनुपर्ने अपेक्षाका वीच देशको समग्र अवस्थामा परिवर्तन उनको मूख्य चुनौति हो ।