खोज

बुटवल, ११ पुस ।

नेवारी कला, संस्कृति र परिकारको प्रचारप्रसार र प्रवद्र्धन गर्दै आएको बुटवलका सामाजिक संघसंस्थाहरुले नेवारी भोज तथा सास्कृतिक कार्यक्रम गरेको छ । विश्व हिन्दु महासंघको सभाहलमा सोमबार लायनेश क्लब अफ बुटवल नेवारी भोज तथा सास्कृतिक कार्यक्रम गरिएको हो ।

मेरो क्लब बलियो क्लब नारा राखेर सामाजिक कार्यमा अग्रसर लायन्स क्लब अफ बुटवल, लायनेश क्लब अफ बुटवल र लियो क्लब अफ बुटवलको संयुक्त आयोजनामा कार्यक्रम गरिएको आयोजक क्लबका लायनेश मेनुका श्रेष्ठले बताईन् । नेवारी भोज कार्यक्रममा आमन्त्रितहरुलाई नेवारी संस्कृति अनुसार टिकासगुन दिएर स्वागत गरिएको थियो । सगुनमा छोयला (पोलेको मासु), छों (जाड), बारा (मासको रोटी) का परिकार थिए । यसैगरि भोजमा भने बजी (चिउरा), मुस्या (भटमास), छोयला, झोल मासु, योमरी, आलुको अचार, बोडी दाना, साग, मेथीको चट्नी सहित वासः(लोकल रक्सी) को व्यवस्था गरिएको उनले बताईन् ।

कार्यक्रमको उदघाटन गर्दै लायन्स डिष्टिक ३२५ पि का डिस्ट्रिक गभर्नर नवराज न्यौपानेले नेवार समुदाय कला, संस्कृतिमा धनि भएको बताए । खानाका परिकार र संस्कृतिकै कारण पहिचान बनाउन सफल भएका नेवारहरु समयअनुसार स्वस्थ्यकर खानपिन गर्ने वैज्ञानिक रुपमा पुष्टि भएको बताए । भोजले भाषा, संस्कृति र परिकारको संरक्षणमा टेवा पुग्ने उनले दाबी गरे ।

लायन्स क्लव अफ बुटवलका पूर्व अध्यक्ष एवं सल्लाहकार अनिल प्रसाद श्रेष्ठले सामाजिक संघसंस्थाहरुबाट गरिने कार्यक्रमबाट समुदायको संस्कृतिको जगेर्नामा योगदान मिल्ने बताए । कार्यक्रममा क्लवको प्रथम उपाध्यक्ष अर्जुनमान सैजु, द्वितिय उपाध्यक्ष पुरुषोत्तम प्रधानाङ्गले नेवारी भाषा र संस्कृतिका विषयमा चर्चा गरेका थिए । कार्यक्रममा नेवाः कलाकारहरुले नेवारी भाषाका गितमा नृत्य प्रस्तुत गरेका थिए । भाषा, कला र संस्कृतिका हिसावले सम्पन्न जातीका रुपमा रहेको नेवाः समुदाय विशेषगरि खानाका परिकारमा निकै समृद्ध मानिन्छ । वर्षका सबै महिनाहरुमा कुनै न कुनै पर्वका नाममा भोज गर्ने नेवाः भोय (नेवारी भोज) मौसम अनुसार स्वस्थकर र पाचन योग्य पन रहेको नेवाः अगुवाहरुको दाबी छ ।