खोज

चन्द्रौटा (कपिलवस्तु), ९ पुस ।

मुस्लिम आयोगका सदस्य मिर्जा अर्सद बेगले उमेर हद बन्दीका कारण मुस्लिम महिला स्नातक उत्तीर्ण भएपनि आयोगको महिला पद रिक्त रहेको बताएका छन् । सरकारको प्रावधान अनुसार मुस्लिम महिला स्नातक उत्तीर्ण नभेटिदा आयोगको पद रिक्त रहेको उनले बताए ।

कपिलवस्तुको चन्द्रौटामा शनिबार आयोगद्वारा आयोजित पत्रकार सम्मेलनमा सदस्य बेगले यस्तो बताएका हुन् । “सरकारको प्रावधानका कारणले मुस्लिम महिला पढे लेखेको त भेट्नुभयो तर अवस्था कहाँ आएर बिग्रियो भने ग्रेजुएट नहुने र ग्रेजुएट भेटिए पनि उमेर नपुग्दा महिला सदस्य पद खाली छ“ उनले थपे “आयोगमा जानलाई समयसीमाले मुस्लिम महिलालाई छेकेको छ ।“

रिक्त महिला पदको लागि प्राविधिक कार्यालय मार्फत सरकारलाई पटकपटक पदपूर्तिका लागि ध्यानाकर्षण गराएको बेगले जिकिर गरे । यसरी सो पद रिक्त रहि रहँदा महिलाको हक अधिकार हनन भएको जस्तो देखिएको बताउँदै उनले चिन्ता व्यक्त गरे । मुस्लिम महिलाको आवाज सुन्नको लागि महिला सदस्य नियुक्तिका लागि सरकारसँग सदस्य बेगले आग्रह गरे ।

नेपालको मुस्लिम समुदायको वर्तमान अवस्था तथा भावी योजनाबारे जनाउँदै मुस्लिम आयोगले अहिलेसम्म नेपालभर मुस्लिम समुदायको हक अधिकारका लागि नीतिनिर्माण गर्ने गरेको उनको भनाइ छ । सदस्य बेगका अनुसार आयोगले देशैभर मदरसा, कबरस्तान र मस्जिदको तथ्यांक संकलन कार्य जारी राखेको छ ।