खोज

कपिलवस्तु, ६ पुस ।

छाडा चौपाया व्यवस्थापनमा स्थानीय सरकार उदासिन बनेको भन्दै कपिलवस्तुको तौलिहवामा विद्यार्थी आन्दोलित बनेका छन् ।

कपिलवस्तु बहुमुखी क्याम्पसमा अध्ययनरत विद्यार्थीले छाडा चौपाया व्यवस्थापनको माग गर्दै जिल्ला प्रशासन कार्यालय कपिलवस्तुमा धर्ना दिई प्रमुख जिल्ला अधिकारीलाई ज्ञापनपत्र बुझाएका छन् । गाई, गोरु लगायतका छाडा चौपाया सडकमा हुँदा विद्यार्थी र सर्वसाधारण समस्यामा परेको र दुर्घटना बढ्दै गएको विद्यार्थीहरु बताउँछन् । प्रशासन कार्यालयको मुख्य प्रवेशद्वारमा धर्ना दिएका विद्यार्थीले स्थानीय सरकारको विरोध गर्दै गाईको संरक्षण गर्नु पर्ने भन्दै नाराबाजी गरे ।

छाडा चौपायाले दुर्घटना बढ्दा विद्यार्थी र सर्वसाधारणलाई समस्या परेपछि बाध्य भएर प्रशासनमा धर्ना र ज्ञापनपत्र दिईएको विद्यार्थी अगुवा सुरज खनालले बताए । छाडा चौपाया व्यवस्थापन समयमै गर्न ध्यान नपुर्याईए विद्यार्थी र युवाहरुले थप आन्दोलनका कार्यक्रम गर्ने विद्यार्थी अगुवा चन्द्र शर्माले चेतावनी दिए ।

कपिलवस्तु बहुमुखी क्याम्पसका अगुवा विद्यार्थीहरु सुरज खनाल, प्रमिशा अर्याल, चन्द्र शर्मा, शिव अग्रहरी, रमेश कुमार गुप्ता र शिव कुमार गुप्ता लगायतले आफ्ना माग सहितको ज्ञापनपत्र प्रमुख जिल्ला अधिकारी धर्मेन्द्र कुमार मिश्रलाई बुझाएका थिए । सो ज्ञापनपत्रमा राष्ट्रिय जनावर गाईको संरक्षण हुनु पर्ने र दुर्घटना न्युनीकरणका लागि छाडा चौपायाको शीघ्र व्यवस्थापन गर्नु पर्ने लगायतका माग राखिएको छ ।

ज्ञापनपत्र बुझ्दै प्रजिअ मिश्रले छाडा चौपायाको व्यवस्थापनका लागि आफुहरु प्रयासरत रहेको बताए । बुद्धभूमि नगरपालिकाको गब्दाहवा र बाणगंगा नदी छेउँको दुई स्थानमा छाडा चौपाया व्यवस्थापन गर्ने योजना अगाडि बढाएको उनले स्पष्ट पारे । व्यवस्थापनका लागि प्रक्रिया अगाडि बढेको जानकारी दिदै संघीय सरकारले वन क्षेत्रको जग्गा भोगाधिकारको लागि नयाँ सरकार बने लगत्तै निर्णय गर्नेमा आशावादी रहेको र सो लगत्तै छाडा चौपायाको व्यवस्थापन सहज हुने उनले जानकारी दिए ।

आगामी दिनमा पनि जिल्लाका सबै स्थानीय तहसँग समन्वय गरी समस्या समाधानका लागि पहल गर्ने प्रजिअ मिश्रले प्रतिबद्धता व्यक्त गरे ।