खोज

बुटवल, ५ पुस ।

दोस्रो कालिका रनिङशिल्ड प्रतियोगिता २०७९ मा कुँवरवर्ती ईङलिश बोर्डिङ स्कुल च्याम्पियन बनेको छ । कालिका मानवज्ञान माध्यमिक विद्यालयको ६२ औ वार्षिकोत्सव तथा अभिभावक दिवसको अवसरमा भएको प्रतियोगिताको मंगलबारको खेलमा १० स्वर्ण ३ रजत र एक कास्य पदक जित्दै प्रतियोगिताको च्याम्पियन बनेको हो ।

प्रतियोगितामा आयोजक कालिका मानव ज्ञान मावि ९ स्वर्ण, ५ रजत र एक कास्य सहित उपविजेतामा चित्त बुझाएको छ । यसैगरी २ स्वर्ण र २ रजत पदक जित्दै एभरेष्ट तेस्रो भएको छ । प्रतियोगिताको प्रथम, द्वितीय र तृतीय टिमलाई नगद ५० हजार, ३० हजार र २० हजार रुपैयाँ, शिल्ड, मेडल, प्रमाणपत्रबाट पुरस्कृत गरिएको छ । प्रतियोगितामा निजी तथा सामुदायिक ५० वटा विद्यालयहरुले भाग लिएका थिए ।

छात्र भलिबलमा कुँवरवर्ती ई बोर्डिङ स्कुलले स्वर्ण हात पारेको छ । फाईनल खेलमा उजिरसिह माविलाई ३–१ को सेटमा जित निकाल्दै स्वर्ण हात पारेको हो । पहिलो सेट उजिरसिह माविले २५–२० को अंकले अग्रता लिएको थियो । दोस्रो सेटपछि भने कुँवरवर्ती खेलमा फर्कियो । दोस्रो सेट २५–१६ अंक, तेस्रो सेट २५–१९ र चौथो सेट लगातार २५–१७ अंकले जित निकाल्दै खेलमा फर्कियो । छात्र भलिबलतर्फ नै तेस्रो स्थानका लागि भएको खेलमा न्यू होराईजन ईङलिश बोर्डिङ स्कुलले कालिका मानवज्ञानलाई २–शुन्यको सोझो सेटमा पराजित गर्दै विजयी भएको छ ।

छात्रा भलिबलको फाईनल खेलमा एभरेष्ट ईङलिश बोर्डिङ स्कुलले न्यू होराईजन ईङ्लिश बोर्डिङ स्कुलमाथि ३–० को सेटमा खेल आफनो पोल्टामा पार्न सफल भयो । बेष्ट अफ फाईभमा खेलाईएको खेलको पहिलो सेट एभरेष्ट ईङलिश बोर्डिङ स्कुलले २५–१७ अंकले जित्दै अग्रता लिएको थियो । दोस्रो सेट २५–१५ र तेस्रो सेट २५–७ अंकले लगातार जित निकाल्दै उपाधि हात पारेको हो । यसैगरी तेस्रो स्थानका लागि भएको खेलमा दीप बोर्डिङ स्कुलले नवज्योति माविलाई २–० सेटमा पराजित गरेको छ ।

यसैगरी छात्र कबड्डीको फाईनल खेलमा आयोजक कालिका मानव ज्ञान माविले शिवपुर माविलाई ११३–२८ अंकले पराजित गर्दै स्वर्ण हात पारेको छ । क्यानन ईङ्लिश बोर्डिङ स्कुल तेस्रो भएको छ । छात्रा कबड्डीको उपाधि भने न्यु होराईजन माविले जितेको छ । फाईनल खेलमा आयोजक कालिका मानव ज्ञान माविलाई ४२–३५ अंकले जित्दै स्वर्ण हात पारेको हो ।