खोज

पाल्पा,४ पुस ।

पाल्पा जिल्लाका स्थानीय सरकारहरुले जमिनको वर्गीकरण सुरु गरेका छन् । दुई वटा नगर सरकारले आफ्नो सिमा क्षेत्र भित्रको जमिन वर्गीकरण गरेका हुन् । तानसेन र रामपुर नगर सरकारको भु–उपयोग परिषदको बैठकले नगर भित्रको जमिन वर्गीकरण गरेका हुन् ।

तानसेन नगर सरकारले नगर भित्रको जमिनलाई ६ बटा क्षेत्रमा वर्गीकरण गर्ने निर्णय गरेको छ । नगर सरकारले कृषि, आवास, खानी, सिमसार, वन, व्यावसायिक क्षेत्रमा वर्गीकरण गरेको छ । नगर भित्रको सडक, वन जगंल, खानी क्षेत्रलाई आधार मानेर वर्गीकरण गरिएको नगर प्रमुख सन्तोषलाल श्रेष्ठले बताए । जमिनको वर्गीकरण गरेर स्विकृतीको लागि सम्बन्धित निकायमा पठाइएको उनले बताए ।

रामपुर नगर सरकारले पनि आवास, कृषि, औद्योगिक क्षेत्र समेटेर वर्गीकरण गरिएको रामपुर नगर सरकारका प्रमुख रमण थापाले बताए । प्रमुख थापाका अनुसार ६ मिटर चौडाई भएको सडकबाट दायाँ, बायाँ ५० मिटर आठ मिटर चौडाइ भएको सडकबाट ७० मिटर, १० मिटर चौडाई भएको सडकबाट ८० मिटर र १० मिटर भन्दा माथि मापदण्ड भएको सडकबाट दायाँ, बायाँ सय मिटर सम्मलाई आवासीय क्षेत्रमा वर्गीकरण गरेको छ । बैठकले अंशवण्डा गर्दा आवास थप्नु पर्ने भए आपसी समझदारीमा मापदण्ड अनुरुप बाटो बिस्तार गरी आवास बनाउन सकिने निर्णय भएको उनले बताए ।

बैठकले नगर भित्रको समथर भु–भाग छाडी पहाडी क्षेत्रको बाटोको दायाँ बायाँ ३० मिटर क्षेत्रलाई आवास क्षेत्रमा वर्गीकरण गरेको छ । त्यसैगरी कालीगण्डकी करिडोर सडकबाट सय मिटर दायाँबायाँ क्षेत्रलाई व्यावसायिक क्षेत्र तोकिदिएको छ । रामपुर नगर सरकारले किसानबारीदेखि तुरुन्दी खोला सम्मको मुख्य सडकमा पर्ने विरेन्द्र टारको उत्तर तर्फको ९६ रोपनी क्षेत्रफललाई औद्योगिक क्षेत्र निर्धारण गरेको छ । नगर भित्र रहेका खानी तथा खनिज क्षेत्र नदी तथा ताल सिमसार सार्वजनिक उपयोगका क्षेत्र सांस्कृतिक तथा पुरातात्विक महत्व बोकेको क्षेत्र बाहेक अन्य क्षेत्रलाई कृषि क्षेत्र निर्धारण गरिएको नगरपालिकाले जनाएको छ । जिल्लाको माथागढी, पुर्वखोला, वगनासकाली गाउँपालिकाले जमिनको वर्गीकरणको लागि प्रराभ्भिक छलफल गरेको मालपोत कार्यलयका प्रमुख दुर्गा प्रसाद खनालले बताए । स्थानीय सरकारहरुले कित्ताकाट खुला गरे पनि तल्कालै कित्ताकाट खुल्न भने कठिन देखिएको छ ।