खोज

बर्दघाट, १ पुस ।

लुम्बिनी प्रदेशका प्रदेश प्रमुख अमिक शेरचनले अर्थतन्त्र परनिर्भर हुँदा देश विकास हुन नसकेको बताएका छन् । बर्दघाट उद्योग वाणिज्य सँघको आयोजनामा शुक्रबारबाट सुरु भएको छैंटौँ बर्दघाट कृषि, पर्यटन तथा औद्योगिक ब्यापार मेला २०७९ को उद्घाटन गर्दै प्रमुख शेरचनले उक्त कुरा बताएका हुन् ।

नेपाल प्राकृतिक सम्पदामा धनी मुलुक हुँदा हुँदै पनि प्रकृतिको समुचित ब्यवस्थापन गर्न नसक्दा देश विकास हुन नसकेको शेरचनको भनाइ थियो । नेपालकै कच्चा पदार्थको पूर्ण उपयोग गरी उत्पादित वस्तुमात्र स्वदेशी उत्पादन हुने बताउँदै प्रमुख शेरचनले बाहिरबाट सामान ल्याएर जोडजाड पारेका सामान नेपाली उत्पादन भन्न नमिल्ने बताए ।
उनले स्थानीय स्तरमा कृषि, पर्यटन र साना उद्योगले स्वावलम्बी बनाउने बताउँदै सरकारले स्थानीय उत्पादनमा समेत जोड दिनुपर्ने बताए ।

कार्यक्रममा पश्चिम नवलपरासी क्षेत्र नम्बर १ (१) का प्रदेश साँसद विश्वप्रेम पाठक, बर्दघाट नगरपालिकाका नगर प्रमुख शम्भुलाल श्रेष्ठ, उपप्रमुख रुद्र प्रकाश उपाध्याय, बर्दघाट बजार विकास समितिका अध्यक्ष तारा गौतम लगायतले स्थानीय उत्पादनलाई जोड दिँदै अर्थतन्त्रमा टेवा पुर्याउनु पर्ने बताएका थिए ।

बर्दघाट उद्योग वाणिज्य सँघका अध्यक्ष लेखनाथ न्यौपानेले सँस्था स्थापना भएको छोटो समय भएपनि ठूला उद्योग भन्दा पनि साना उद्योग र ब्यवसायीहरुलाई प्राथमिकतामा राख्दै संघ अघि बढेको बताएका थिए ।

पुस १ देखि ११ गतेसम्म सञ्चालन हुने ब्यापार मेलामा कृषि, पर्यटन, स्थानीय जातजातीका सँस्कृतिको प्रदर्शनी, बाल उद्यान लगायत मनोरन्जनका ब्यवस्था रहेको सँघका महासचिव दिनेश न्यौपानेले जानकारी दिए ।

दुइसय ब्यावसायिक स्टल रहेको महोत्सवमा स्थानीय कृषि उत्पादन, लघु उद्यमीका उत्पादन समेत रहेको महासचिव न्यौपानेले जानकारी दिए । महोत्सव बर्दघाट नगरपालिका वडा नम्बर ४ को हरियाली नगर स्थित बर्दघाट मण्डपमा सँचालन भइरहेको छ ।