खोज

चन्द्रौटा (कपिलवस्तु), २७ मंसिर ।

कपिलवस्तुको शिवराज नगरपालिकाको ३ नम्बर वडा कार्यालयले नागरिकहरुलाई सहज रुपमा सेवा प्रदान गर्नका लागि सेवा केन्द्र सञ्चालनमा ल्याएको छ ।

नागरिकले वडा कार्यालयमा सेवा लिन जाँदा दिनभरि समय लाग्नुको साथै उनीहरुलाई हुने विविध समस्यालाई मध्यनजर गर्दै कार्यालय बलुहवामा सेवा केन्द्र सञ्चालन गरिएको हो । वडा कार्यालयबाट प्राप्त हुने सबै सेवा, सुविधाहरु दिनका लागि मंगलबार एक कार्यक्रमबीच औपचारिक रुपमा सेवा केन्द्रको उदघाटन गरिएको वडा कार्यालयले जनाएको छ ।

सेवा केन्द्रले हप्ताको एक दिन मंगलबार मात्र सेवा केन्द्रबाट नागरिकलाई सेवा दिने र तत्कालै सेवा लिनुपर्ने अवस्था आएमा वडा कार्यालयबाट सेवा लिनुपर्ने वडा अध्यक्ष टेकलाल सापकोटाले जानकारी दिए ।

सेवा केन्द्रले बलुहवा, होचवा, मजगाउँ, बलुहवा डाँडा र काफलफुट्टाका नागरिकलाई सेवा प्रदान गरिने सापकोटाले बताए । सहज सेवाग्राहीले एउटा सामान्य सिफारिसका लागि वडा कार्यालय पुग्न ३ सयदेखि ४ सय रुपैयाँ गाडी भाडा तिर्नुपर्ने बाध्यता रहेको बताउँछन् । आफ्नै पायक पर्ने ठाउँमा सेवा केन्द्र स्थापना भएपछि वडा कार्यालय जाँदा हुने समस्या हटेको भन्दै वडाबासीहरु खुसी भएका छन् ।

प्रदेश सांसद अर्जुन कुमार केसीले निर्वाचनको बेला जनतालाई दिएको वाचा र प्रतिबद्धताहरु पूरा गर्दै जाने बताउँदै यस वडामा नदी, खोलानाला धेरै भएकाले नदी कटानबाट हुने क्षतिलाई दुई वर्षभित्र तटबन्ध निर्माण गरी व्यवस्थापन गरिने दाबी गरे । उनले वडा नम्बर ३ का जनताहरु कृषि पेसामा निर्भर हुने हुँदा कृषिका योजनालाई प्राथमिकतामा राख्ने बताए ।

आर्थिक पाटोलाई बलियो बनाउन उत्पादनमुलक कार्यमा आवश्यक लगानी गरी अगाडि बढ्न केसीले अनुरोध समेत गरे । उनले दुनाटपरी बनाउन सकिने लगायतको उदाहरण दिँदै आफ्नै स्थानीय स्तरमा उपलब्ध स्रोत, साधनको प्रयोग गरि व्यवसायिक आवश्यक रहेको बताए ।

यसैगरी शिवराज नगर उप–प्रमुख शिव कुमारी थारुले नागरिकले पाउने हरेक सेवालाई सहजरुपमा उपलब्ध गराउन प्रयासरत रहेको बताइन् । उनले सेवा केन्द्रबाट नागरिकलाई प्राप्त हुने सेवा सहज हुने जिकिर गर्दै ’गाउँघर क्लिनिक’ सञ्चालनका लागि बजेटसमेत छुट्टयाइएको जनाइन् । उनले पायक पर्ने यसै ठाउँ छिटै ’गाउँघर क्लिनिक’ स्थापना गरी सेवा प्रदान गरिने बताइन् ।

यस्तै वडा अध्यक्ष टेकलाल सापकोटाले कृषिलाई प्राथमिकता दिने बताउँदै तरकारी खेती, खसीबोका पालन पेसा गर्ने व्यक्ति अनुदान दिने गरेको बताए । उनले तरकारी र खसीबोका उत्पादन गरी तोकिएको संस्था वा केन्द्रमार्फत बेच्ने कषकलाई अनुदान उपलब्ध गराइएको जनाए । कृषि पेसामा आत्मनिर्भर हुन व्यावसायिक रुपमा कदम चाल्न जरुरी रहेको वडा अध्यक्ष सापकोटाको भनाइ छ । उनले जनताको हरेक समस्यालाई नजिकबाट नियाल्दै आवश्यक बजेट विनियोजनसमेग गर्ने गरेको बताए ।