खोज

बुटवल, २१ मंसिर ।

लुम्बिनी प्रदेशमा मुख्यमन्त्री कुलप्रसाद केसीले मंगलबार राति आफ्नो कार्यालयका सामान रातारात स्थायी राजधानी तोकिएको दाङमा लगे । दाङको देउखुरी उपत्यकाभित्र अस्थायी संरचनामै मुख्यमन्त्री कार्यालयका सामा लगियो । तर , मन्त्रालयका सामान लगेपनि कर्मचारी भने अझै दाङ सरेका छैनन् ।

“दाङमा कर्मचारी व्यवस्थापनको पाटो अझै टुंगिएको छैन, सामान लगेपनि तत्काल कर्मचारी जाने कुुरा भएन”–मुख्यमन्त्री कार्यालयका एक कर्मचारीले भने । अहिले सामान व्यवस्थापनका लागि भन्दै मुख्यमन्त्री केसीले आफ्नो सचिवालयका सीमित कर्मचारी मात्रै लगेका छन् । “मुख्यमन्त्री कार्यालयको बोर्ड झुण्ड्याउँदैमा केही हुँदैन, कर्मचारी नभएसम्म सामान सारेर मात्र अर्थ छैन”–ती कर्मचारीले भने ।

स्थायी संरचना नबन्दै मुख्यमन्त्री कार्यालयका सामान दाङ सारिएकोमा धेरैजसो कर्मचारी असन्तुष्ट छन् । “पहिलो कुरा त देउखुरी उपत्यका राजधानीको लागि उपयुक्त स्थान नै होइन, त्यहाँ न त पूर्वाधार छ, न त अन्य कुराहरुको पहुँच छ, तर पनि राजधानी तोकिसकेपछि पूर्वाधार निर्माणमा जुट्नु पथ्र्यो, त्यसो नभै मन्त्रालय सार्दैमा राजधानी व्यवस्थापनको काम झनै बेबारिसे हुन्छ”–कृषि तथा भूमि व्यवस्था मन्त्रालयका अर्का कर्मचारीले भने ।

लुम्बिनी प्रदेशको अस्थायी मुकाम बुटवल हुँदा त कर्मचारीहरु टिक्न सकेका थिएनन् भने दाङमा कर्मचारी टिकाउन झनै समस्या हुने उनले बताए । “अधिकांश कर्मचारी बुटवल बस्छन्, दाङ गैहाले भनेपनि शुक्रबार बुटवल आउँछन् र आइतबार ढिलो गरी मात्र देउखुरीमा कार्यालय भेटाउन पुग्छन्, यस हिसावले सातामा चार दिन मात्रै कामकाज हुने देखिन्छ”–ती कर्मचारीले भने ।

बुटवल मुकाम हुँदा लुम्बिनी प्रदेशमा एक वर्ष काम गर्ने सचिवहरूको संख्या निकै कम थियो । प्रदेशमा पाँच वर्षको अवधिमा ५० सचिव फेरिएका थिए । अव दाङमा भने यो समस्या अरु बढ्ने कर्मचारीहरु बताउँछन् । लुम्बिनीमा हाल १३ वटा मन्त्रालय छ । मुख्यमन्त्री तथा मन्त्रिपरिषद् कार्यालयमा एक प्रमुख सचिव र दुई सचिव रहेका छन् । यहाँका अन्य १२ मन्त्रालयमा १२ सचिवको दरबन्दी रहेको छ ।

मुख्यमन्त्री कार्यालयका प्रवक्ता नरेन्द्रकुमार रानाले कार्यालयका सामान लगिए पनि कर्मचारी व्यवस्थापनको काम अझै भैनसकेको बताए । “कर्मचारी व्यवस्थापन नभएसम्म बुटवलबाटै कामकाज हुन्छ, व्यवस्थापनको पाटो टुंगिएपछि सरकार नै जाँदा कर्मचारी यहाँ बस्ने कुुरा भएन”–उनले भने ।