खोज

नवलपरासी, १८ मंसिर ।

जिल्लाको हुलाकी सडक पुल म्याद सकिए पनि नबन्दा स्थानीयले दुःखेसो पोखेका छन् । प्राविधिक र सम्बन्धित ठेकेदारले पुल निर्माणको कार्य बेलामै नगरिदिंदा समस्या भएको भन्दै स्थानीयबासीले दुःखेसो पोखेका हुन् ।

पुल निर्माण गर्ने ठेकेदार समेत अहिले साईट छोडेर हिंडेको भन्दै अब पुल बनाउने जिम्मेवारी कस्को ? भनि जिज्ञासा राख्ने गरेका छन् । “पुलको शिलान्यास हुँदा म्यादभित्रै पुल बन्छ भनेर यस क्षेत्रका मन्त्री, साँसदले भाषण ठोकेका थिए, तर हालसम्म पुल निर्माण कार्य रोकिएको छ । पुल नबन्दा धेरै समस्या भएको छ”– रामग्राम–१५ सुक्रौलीका रामकिसुन केवटले भने, “खोलामा पुल नहँुदा यस क्षेत्रको कुईया, बडगो, घिनहा, पण्डितपुर लगायतका आधा दर्जन बस्तीलाई समस्या भएको छ ।” विरामी, गर्भवती महिलालाई उपचारका लागि परासी लैजान पनि कि भैरहवा भुमही राजमार्गको पुल पुग्नु पर्ने कि त डिघवलको पुल भएर जानुपर्ने बाध्यता रहेको छ । खेतीपाती गर्दा पनि समस्या भइरहेको उनको दुःखेसो छ ।

सडक पूर्वाधार विकास कार्यालय (आरआईडिओ) मणिग्राम रुपन्देहीले उक्त पुलको डिजाईन गरी ठेक्का लगाएको थियो । उक्त पुलको निर्माण कार्यको जिम्मेवारी एम.एस सगुन ओम इन्फ्राटेक जेभि कालिकानगर बुटवल रुपन्देहीले ठेक्का साकार गरी निर्माण सुरु गरेको थियो । पुलको शिलान्यास तत्कालीन लुम्बिनी प्रदेश सरकारका भौतिक पूर्वाधार विकास मन्त्री बैजनाथ चौधरीले ठूलै समारोहको बीच गरेका थिए । सम्बन्धित निर्माण कम्पनीले यही २०७९ साल कातिक ३० गते भित्र पुलको निर्माण कार्य सम्पन्न गर्नु पर्ने थियो । दातृ निकाय हुन् वा नेपाली जनता अनुदान र कर वापत सरकारलाई रकम बुझाउँछन् ।

तर सरकारी ओहदामा पुग्ने इन्जिनियर र सरकारी कर्मचारीलाई त्यसको कुनै मतलब छैन । आफ्नो तलब सुविधा खान पाए पुग्यो, जनताको सेवा सुविधाको कुनै मतलब छैन् । स्थानीयबासीले कराएर पनि के गर्न सक्छन ? २०७७ साल बैशाख ३१ गते सम्झौता भई २०७९ कातिक ३० भित्रमा पुलको निर्माण सम्पन्न गर्ने गरी सम्झौता भएको थियो । ६० मिटर लामो पुलको स्पान ३० बाई २ रहेको छ । स्वीस सरकार विकास सहयोग (एसडिसी) को ८ करोड ७९ लाख ९५ हजार ४ सय १९ रुपियाँमा पुलको निर्माण कार्य सम्पन्न गर्नु पर्ने थियो । पुलको प्राविधिक सहयोग स्थानीय सडक पुल कार्यक्रम (एलआरविपी) र स्थानीय सडक पुल सहयोग ईकाई) एलआरविएसयु) मणिग्रामले नै गर्दै आएको छ ।

सोही पुल भएर अहिले विश्व बैंकको ६२ करोड लगानीमा प्राचिन कोलिय गणराज्यको राजधानी भएको (हाल पण्डितपुर) जोड्ने सडकको समेत सर्वेक्षण भई निर्माण प्रकृया पनि अघि बढेको छ । सडक बन्यो तर पुल बनेन भन्ने अर्को समस्या देखिन सक्छ । पुल निर्माण ढिलाईले स्थानीयबासीमा निरासा छाएको छ । पुल निर्माणको ढिलाईबारे सडक डिभिजनसँग पहल भई रहेको जिल्ला समन्वय समिति (जिससं) प्रमुख भगौती प्रसाद यादवले दाबी गरेका छन् ।