खोज

रोल्पा, १८ मंसिर ।

रोल्पाका चार विद्यालयले स्कूल बस संचालनमा ल्याएका छन् । जिल्लाका तीन सामुदायिक र एक संस्थागत गरी चार वटा विद्यालयले स्कूल बस संचालनमा ल्याएका हुन् ।

शिक्षा विकास तथा समन्वय ईकाइ रोल्पाका अनुसार स्कुल बस सञ्चालनमा ल्याउने सामुदायिक विद्यालयहरुमा परिवर्तन गाउँपालिका वडा नं.. ५ मा रहेको नेपाल राष्ट्रिय मावि मौलाबोट रांकोट, रोल्पा नगरपालिका वडा नं. ६ कोटगाउँमा रहेको नेपाल मावि कोटगाउँ र जिल्ला सदरमुकाम लिवाङ्गमा रहेको बालकल्याण मावि लिवाङ रहेका छन् । स्कूल बस सञ्चालन गर्ने संंस्थागत विद्यालयमा सुनिलस्मृती गाउँपालिका वडा नंं. २ खुंग्रीमा रहेको ज्ञान मन्दिर मावि रहेका छन् ।

नेपाल मावि कोटगाउँ, बालकल्याण मावि लिवाङ र ज्ञान मन्दिर मावि खुंग्रीले १÷१ वटा र नेपाल राष्ट्रिय मावि मौलावोट रांकोटले २ वटा स्कूल बस सञ्चालनमा ल्याएका छन् ।

भौगोलिक विकटताका कारण टाढा टाढाबाट पैदल यात्रा मार्फत विद्यालय आउन धेरै समय लाग्ने भएपछि विद्यार्थीको सुविधालाई ध्यानमा राखेर स्कूल बस सञ्चालनमा ल्याएको विद्यालयहरुको दावी छ ।

स्कूल बस सञ्चालन गर्ने तीनवटै सामुदायिक विद्यालय जिल्लाका नमूना विद्यालय हुन् । नेपाल राष्ट्रिय मावि मौलावोट रांकोट र बालकल्याण मावि लिवाङ संघीय सरकारद्वारा छनौट गरिएका नमूना विद्यालय हुन् भने नेपाल मावि कोटगाउँ लुम्विनी प्रदेशद्वारा छनौट गरिएको प्रदेश स्तरीय नमूना विद्यालय हो ।

स्कूल बस सञ्चालनसँगै विद्यालयमा विद्यार्थीको आकर्षण समेत बढेको बालकल्याण मावि लिवाङका प्रधानाध्यापक मधुसुदन पोख्रेलको भनाई छ । “भौगोलिक विकटताका कारण घण्टौ पैदल यात्रा गर्न वाध्य विद्यार्थीहरु बस सेवा सञ्चालनसँगै आवतजावतमा सहजता भएको छ”–प्राचार्य पोख्रेलले भने । विद्यार्थीको अत्यधिक चाप रहेकाले एउटा बसले मात्रै धान्ने अवस्था नभएकाले अर्को बस पनि माग भएको पोख्रेलले बताए ।

विद्यालयमा बस सेवा सुरु गरेसँगै विद्यार्थीहरुमा सकारात्मक प्रभाव परेको नेपाल राष्ट्रिय मावि मौलावोट रांकोटका प्रधानाध्यापक गोपाल केसीको भनाई छ । “विद्यालय आवत जावतमा घण्टौ समय खर्चने वाध्यता हटेको छ”–केसीले भने । विद्यार्थीले दैनिक विद्यालय आवतजावतमा खर्चने समय पठनपाठनमा लगाउन पाएको प्रधानाध्यापक केसीले बताए । बस सञ्चालनका लागि खर्च धेरै आउने भएकाले आर्थिक व्यवस्थापनको पाटो चूनौतीपूर्ण देखिएको प्रधानाध्यापक केसीको भनाई छ ।

“रोल्पा जस्तो दुर्गम जिल्लाका सामुदायिक विद्यालयहरुले पनि विद्यार्थीहरुको सुविधालाई ध्यान दिएर बस सेवा सञ्चालनमा ल्याउनु राम्रो पक्ष हो”–अभिभावक जीतवहादुर डाँगीले भने । “घण्टौ समय लगाएर विद्यालय आवतजावत गर्दा विद्यार्थीले पढाईमा समय दिन सकेका थिएनन, स्कुल बस सेवाले यो समस्यालाई केही हद सम्म न्यूनिकरण गरेको छ”–अभिभावक डाँगीले भने ।
रोल्पामा ४०७ सामुदायिक र २९ संंस्थागत सहित ४३६ वटा विद्यालय रहेका छन् । ती विद्यालयमा करिव ८५ हजार विद्यार्थीले अध्ययन गर्ने गर्दछन् ।