खोज

गुल्मी, १६ मङ्सिर ।

नेपाली काँग्रेसका नेता एवं गुल्मी क्षेत्र नं १ का प्रतिनिधि सभा सदस्य डा.चन्द्र भण्डारीले अहिलेको वर्तमान पार्टीका नेताहरुबाट देश चल्न नसक्ने बताएका छन् । परम्परागत सोंचले अब मुलुकमा उत्पन्न वर्तमान चुनौतीहरुको समस्या समाधान हुन नसक्ने उनको तर्क छ । उनले पुराना तथा पाका नेताहरुले अब विश्राम लिएर मुलुकलाई अघि बढाउन नयाँ नेतृत्वलाई अगाडि सार्नु पर्ने बताए ।

शुक्रबार गुल्मीको सदरमुकाम तम्घासस्थित विपी स्मृति भवनमा आयोजित पत्रकार भेटघाट कार्यक्रममा बोल्दै नेता भण्डारीले उक्त कुरा बताएका हुन् । देशलाई सही दिशामा अघि बढाउन र वर्तमान समस्यालाई समाधान गर्नका लागि युवाहरुको महत्वपूर्ण भूमिका हुने भन्दै नेता भण्डारीले अबको नेतृत्व युवाको काँधमा जानु पर्ने बताए ।

निर्वाचनको बेलामा नेतृत्वको विरोध गर्दा झन आफै माथि प्रहार हुने र सबै मिलेर चुनाव हराउने डरका कारण आफु केही नबोलेको उनले प्रष्ट्याए । ‘अब निर्वाचन सकियो, काठमाडौ जान्छु र सबै मिडियाका अगाडि म नेतृत्वको विषयमा बोल्ने छु,’ नेता भण्डारीले भने ।

वर्तमान समयमा दलहरुले प्राप्त गरेको निर्वाचनको परिणामलाई लिएर बजारमा भिन्न भिन्न आँकलन र अडकलवाजीहरु चलिरहेको भन्दै नेता भण्डारीले नेपाली काँग्रेसले सबै दलहरुलाई मिलाएर अघि बढ्ने बताए । पहिलो काम भनेको गठबन्धनलाई मिलाउने र त्यसपछि प्रतिपक्षसँग पनि सहकार्य गर्दै अघि बढने बताए ।

पत्रकार भेटघाट कार्यक्रमममा भण्डारीले निर्वाचन जित्नु केवल मन्त्री बन्नैका लागि मात्र नभएको भन्दै मुलुकलाई केही परिवर्तनकारी काम गर्नका निम्ती मन्त्री बन्ने सोंच बनाउनु पर्ने बताए । पत्रकारहरुको जिज्ञासामा भण्डारीले कसको नेतृत्वमा सरकार बनाउने भन्ने विषय पार्टी भित्र र गठबन्धनमा जोडिएका दलहरुसँग बसेर सहमति खोजिने जानकारी गराए ।

भण्डारीले गुल्मी जिल्लालाई विकास निर्माणको हिसाबले नमुना जिल्ला बनाउने गरी आफु अघि बढ्ने उद्घोष गरे । उनले गुल्मीमा विकास निर्माणको काम कछुवाको गतिमा अघि बढेको गुनासो समेत गरेका छन् । रेसुंगा नगरपालिकामा शुक्रबार कार्यालय प्रमुखहरुसँग अन्तत्र्रिmया गर्दै उनले विकास निर्माणको काममा तीब्रता दिन कार्यालय प्रमुखहरुलाई आग्रह गरेका छन् ।

कार्यक्रममा गुल्मी क्षेत्र नं १ अन्तर्गत प्रदेश सभा (२) का सांसद धनेन्द्र कार्कीले जिल्लाको विकासका लागि आफुले निर्वाचनमा गरेका प्रतिबद्धताहरु पुरा गर्ने बताएका थिए ।